Ekonomıkany ártaraptandyrý sharasyna jańa kózqaras qalyptastyrý qajet - O. Sábden
ASTANA. Aqpannyń 19-y. QazAqparat /Qanat Mámetqazyuly/ - Elimizde ekonomıkany ártaraptandyrý sharasyna jańa kózqaras qalyptastyrý qajet. Búgin QR Parlamenti Májilisi janyndaǵy Qoǵamdyq palatanyń otyrysynda «Ekonomıkany ártaraptandyrý - tabysqa jetýdiń kilti» taqyrybynda baıandama jasaǵan palata múshesi ekonomıka ǵylymdarynyń doktory Orazaly Sábden osylaı málim etti,
dep habarlaıdy QazAqparat.
«Elbasy Joldaýynyń ózekti ıdeıasy - ekonomıkany ártaraptandyrý bolyp tabylady. Jalpy klassıkalyq ártaraptandyrý - bir mezgilde bir-birine uqsamaıtyn qyzmet túrlerin damytý, sondaı-aq shyǵaratyn ónim túrlerin keńeıtý degen uǵym boıynsha túsindiriledi. Búgingi ártaraptandyrý - bul ǵasyr ıdeıasy, jumysty jańasha qalyppen júrgizýge ıkemdeý degendi de bildiredi. Dál osy ártaraptandyrý úderisi jáne qyzmet tıimdiliginiń jańa tetikterin qarastyrý sharasy - kompanııanyń damýyn shapshańdatyp, qosymsha tabys tabýǵa, jańa básekelestik basymdyqqa jeteleıdi. Sondyqtan da, ártaraptandyrýǵa naqty qural retinde jańa kózqaras qalyptastyrý qajet», dedi O. Sábden.
Onyń aıtýyna qaraǵanda, kez-kelgen memleket sekildi Qazaqstan da álemdik qaýymdastyq tarapynan qabyldanyp jatqan sharalarǵa basa nazar aýdaryp otyrýy shart. Olaı bolmaǵan jaǵdaıda Qazaqstanǵa daǵdarys saldaryn eńserý úlken qıyndyqqa soqtyrady.
