Ekonomıkany ártaraptandyrý qarqynyn báseńdetýge bolmaıdy - Smaıylov
«Ekonomıkany ártaraptandyrý mınıstrliktiń negizgi mindetteriniń biri sanalady. Bul degenimiz – óńdeý ónerkásibinde jańa óndirister qurý. Ótken jyldyń qorytyndysynda 2 trln teńgeden astam somaǵa 160 ındýstrııalyq joba paıdalanýǵa berildi. Degenmen, bıylǵy jobalardy iske qosý jospary 1,1 trln teńge somaǵa arnalǵan nebary 149 jobaǵa deıin tómendetilgen. Ekonomıkany ártaraptandyrý qarqynyn tómendetýge jol berýge bolmaıdy dep sanaımyn», - dedi Álıhan Smaıylov Indýstrııa jáne ınfraqurylymdyq damý mınıstrliginiń keńeıtilgen alqa otyrysynda.
Osyǵan oraı, Úkimet basshysy ákimdiktermen birlesip, salada júzege asyrylatyn ındýstrııalyq jobalar pýlyn qysqa ýaqyttyń ishinde keńeıtýdi tapsyrdy.
«Óńirlerge saparymyz barysynda kásipkerlerdiń alýan túrli qyzyqty jobalarǵa kóptep bastama jasaıtyndyǵyn kórip júrmiz. Árıne, ınfraqurylymmen, energetıkamen jáne basqa da jaıttarmen baılanysty máseleler bar. Bul máselelerdi jergilikti atqarýshy jáne basqa da memlekettik organdarmen nemese deńgeıine qaraı Úkimette birlese sheshýimiz qajet. Bul jumysta monoqalalardy da damytýdy eskerý óte mańyzdy. Jańa qalalar halyqty qosymsha jumyspen qamtamasyz ete alady», - dedi Úkimet basshysy.
Osy rette Premer-Mınıstr Saran qalasynda Tatneft kompanııasymen birge paıdalanýǵa berilgen dóńgelek shyǵaratyn zaýytty mysalǵa keltirdi. Qazirgi ýaqytta atalǵan zaýytta qalanyń myńnan astam turǵyny jumys istep júr.
«Mınıstrlik osyndaı jobalardy kóbeıtýi qajet. Osy oraıda, Memleket basshysy óńdeýshilerdi qoljetimdi baǵadaǵy qajetti shıkizat kólemimen qamtamasyz etýdi tapsyrǵanyn atap ótkim keledi. Mınıstrlik otandyq óńdeýshi kásiporyndardy bazalyq shıkizatpen qamtamasyz etýi tıis. Sonymen qatar, mınıstrliktiń basqa memlekettik organdarmen birlesip, kásiporyndarǵa ónimderin satýǵa qoldaý kórsetýdi kúsheıtýi de mańyzdy», - dedi ol.
