Ekonomıkanyń jekelegen sektorynda memleket ustanymyn saqtaý básekelestikti burmalamaýy tıis
ASTANA. KAZINFORM — Ekonomıkanyń jekelegen strategııalyq sektorynda memlekettiń ustanymyn saqtaý básekelestikti burmalamaýy tıis. Bul týraly Senat tóraǵasy Máýlen Áshimbaev «Vremıa» gazetinde jarııalanǵan maqalasynda jazdy.
— Kelesi qaǵıdalar ekonomıkanyń qurylymdyq jańarýy men turaqty ósiminiń kilti bolýy tıis: ekonomıkalyq yryqtandyrý, qolaıly bıznes ahýal, teńgerimdi fıskaldy jáne monetarly saıasat, zamanaýı ınfraqurylymdy qalyptastyrý, tehnologııalyq óndirister esebinen ekonomıkany kúrdelendirý, adamı kapıtaldy damytý. Birinshi ári basty qaǵıda júıeni kez kelgen zamanaýı naryqtyq ekonomıka negizderine oraltýǵa arnalǵan: adal erkin básekelestik, — dedi Máýlen Áshimbaev.
Onyń atap ótýinshe, baza Prezıdenttiń ótken jylǵy «Ekonomıkany yryqtandyrý sharalary týraly» Jarlyǵynda kórinis tapqan. Olar: jeke menshikke qol suǵylmaýshylyq, jeke bıznestiń erkindigi, memlekettiń naryqtyq qatynastarǵa aralaspaýy, erkin básekelestik, naryqtarǵa kedergisiz qoljetimdilik, bıznestiń memleketpen qolaıly jáne ashyq ózara qarym-qatynasy.
— Ekonomıkadaǵy memlekettik sektordyń úlesin qysqartý jónindegi sharalardy odan ári keńeıtý qısyndy jalǵasy bolýy tıis. Buǵan jańa memlekettik kompanııalardy qurýǵa jáne jappaı jekeshelendirýdi 2028 jyldan keshiktirmeı aıaqtaýǵa jarııalanǵan moratorıı yqpal etetin bolady. Ekonomıkanyń jekelegen strategııalyq sektorynda memlekettiń ustanymyn saqtaý básekelestikti burmalamaýy tıis. Bul rette memleket barlyǵyna adal jáne teń erejelerdi qamtamasyz etetin, mindetter men quraldardyń naqty sheńberimen shekteletin júıelik oıynshy rólin atqarýy tıis. Osy turǵyda jaqyn arada aýyl sharýashylyǵy jerleri týraly barlyq derekti tsıfrlandyrýdy aıaqtaý, odan ary jerdi tek ashyq onlaın aýktsıondar arqyly berý óte mańyzdy qadam bolady. Bul paıdaly qazbalary bar jer qoınaýy ýchaskelerin satýǵa da qatysty, — dedi Senat spıkeri.
Buǵan deıin Senat tóraǵasy Birikken Ulttar Uıymynyń Ulttar lıgasy taǵdyryn qaıtalaý qaýpi bar ekendigin bildirgen edi.