Ekonomıkanyń ósýi munaı emes sektordyń damýy esebinen qamtamasyz etilýde - Baıbazarov

ASTANA. KAZINFORM – Bıyl qańtar-qarashada ekonomıkanyń ósýi 4,4 paıyzdy qurady. Bul týraly búgin Úkimet otyrysynda Premer-Mınıstrdiń orynbasary – Ulttyq ekonomıka mınıstri Nurlan Baıbazarov aıtty.

- Bıylǵy qańtar-qarashanyń qorytyndysy boıynsha ekonomıkanyń ósýi qańtar-qazanmen salystyrǵanda 0,3 paıyzdyq tarmaqqa jedeldep, 4,4 paıyzdy qurady. Naqty sektordaǵy ósý 5 paıyz boldy. Kórsetiletin qyzmetter salasyndaǵy óndiris 4,5 paıyzǵa artty. Osy jyly ekonomıkanyń ósýi tolyǵymen munaı emes sektordyń damýy esebinen qamtamasyz etilýde. Munaı emes sektordyń ósýi shamamen 5,1 paıyzdy qurady. Ósý serpininiń jaqsarýy aýyl sharýashylyǵynda, óńdeý ónerkásibinde, qurylysta, saýdada jáne kólikte baıqalady, - dedi vıtse-premer.

Onyń atap ótýinshe, salalar arasynda eń joǵary ósýdi aýyl sharýashylyǵy men qurylys salasy kórsetip otyr. Saýda - 8,2, kólik qyzmetteri - 8,1, óńdeý ónerkásibi 5,3 paıyzǵa ósti. Jalpy ishki ónimniń ósýiniń 70 paıyzdan astamy saýda, óńdeý ónerkásibi, aýyl sharýashylyǵy jáne qurylys qamtamasyz etilgen. 

- Negizgi kapıtalǵa salynǵan ınvestıtsııalar 3,1 paıyzǵa ósti. Investıtsııanyń eń joǵary ósýi shıkizattyq emes salalarda baıqalady. Investıtsııa kólemi bilim berýde - 2,2 esege, ǵylymı jáne tehnıkalyq qyzmette – 42,1, kólikte qyzmetterinde – 27,2, óńdeý ónerkásibinde – 18 paıyzǵa ósti. Úzdik kórsetkishter Qaraǵandy, Jetisý, Pavlodar, Túrkistan, Almaty oblystarynda tirkeldi. Bul rette Atyraý, Aqmola, Mańǵystaý jáne Aqtóbe oblystarynda ınvestıtsııalardyń aıtarlyqtaı tómendeýi baıqalady, - dedi Nurlan Baıbazarov.