Ekonomıkanyń óndiristik múmkindikteri ishki suranystyń ósýin qamtamasyz ete almaı otyr – Ulttyq bank

ASTANA. KAZINFORM – Jalpy ishki ónimniń ósimi jyldyq mánde 6,3 paıyzǵa deıin jedeldedi. Bul týraly Ulttyq bank tóraǵasy Tımýr Súleımenov aıtty.

- Ekonomıkalyq belsendilik artyp keledi. Aldyn ala derekter boıynsha bıyl qańtar-shilde aralyǵynda jalpy ishki ónimniń ósimi jyldyq mánde 6,3 paıyzǵa deıin jedeldedi. Oǵan shıkizatqa jatpaıtyn salalarda ınvestıtsııanyń ulǵaıýy, turaqty tutyný jáne munaı sektorynyń qalpyna kelýi áser etti, - dedi Tımýr Súleımenov.

Ulttyq bank basshysynyń aıtýynsha, kólik pen qoımada saqtaý salasynda belsendilik artty. Al qurylys salasy órge basty. Taý-ken óndirý, óńdeý ónerkásibinde jáne saýdada da iskerlik belsendilik aıtarlyqtaı ósip keledi.

- Degenmen, ekonomıkanyń óndiristik múmkindikteri ishki suranystyń ósýin qamtamasyz ete almaı otyr. Inflıatsııalyq qysym kúsheıip, curanys pen usynys arasyndaǵy alshaqtyq saqtalýda, - dedi ol.

Buǵan deıin Ulttyq bank bazalyq mólsherlemeni kóterýi múmkin ekenin jazǵan edik.