Ekonomıkanyń bazalyq salalaryn damytýdyń aldyn ala qorytyndylary shyǵaryldy

ASTANA. KAZINFORM — Ekonomıkalyq ósýdi qamtamasyz etý jónindegi úkimettik shtab ekonomıkanyń bazalyq salalaryn damytýdyń aldyn ala qorytyndylaryn shyǵarǵany belgili boldy.

Ulttyq ekonomıka mınıstrliginiń málimetinshe, vıtse-premer — ulttyq ekonomıka mınıstri Serik Jumanǵarınniń tóraǵalyq etýimen ótken ekonomıkalyq ósimdi qamtamasyz etý jónindegi shtab otyrysynda bazalyq salalardy damytýdyń jyl qorytyndysyndaǵy aldyn ala boljamy qaraldy. Ósý draıverleri burynǵydaı óńdeý ónerkásibi, qurylys jáne azyq-túlik óndirisi bolyp qala bermek.

Óńdeý ónerkásibi

10 aı boıy sala turaqty serpinmen damýda.

Mashına jasaýda (óńdeýdegi úlesi — 17,5%) 11 aıdyń qorytyndysy boıynsha 14%, jyl qorytyndysy boıynsha 16,3% ósim boljanýda.

Hımııa ónerkásibiniń ósýi (óńdeýdegi úlesi — 5,4%) jyl qorytyndysy boıynsha 8% deńgeıinde bolmaq.

Óńdeý salasynda naqty kólemniń 40%-dyq ósimin qamtamasyz etip otyrǵan metallýrgııa ótken jylmen salystyrǵanda 0,7%-ǵa artty. 11 aıdaǵy boljam — 0,8%, jyl qorytyndysy boıynsha 1,1%.

Jalpy, óńdeý ónerkásibindegi jyldyq ósý boljamy — 6,2%. Bul jospardan 0,8 paıyzdyq tarmaqqa joǵary.

Qurylys

Aldyn ala baǵalaýlar boıynsha, jyl sońyna deıin 19,2 mln sharshy metr turǵyn úı paıdalanýǵa beriledi, bul ótken jylmen salystyrǵanda 0,4%-ǵa artyq. Jyl qorytyndysy boıynsha qurylys jumystarynyń kólemi 10,4 trln teńge deńgeıinde bolady dep kútilýde, bul ótken jylǵy kórsetkishten 15%-ǵa artyq.

AÓK-tegi qaıta óńdeý

AÓK-tegi qaıta óńdeý sektory 10 aıda 9,1% turaqty ósim kórsetip otyr. Oǵan un jáne maı ónerkásibi kóp úles qosýda.

Un óndirisi 7%-ǵa — 2,6 mln tonnadan 2,8 mln tonnaǵa deıin artty. Ósimdik maıyn óndirý kólemi 21,7%-ǵa — 596 myń tonnadan 726 myń tonnaǵa deıin ósti.

Jalpy AÓK sektorynda qaıta óńdeýdegi negizgi kapıtalǵa salynatyn ınvestıtsııa 60%-ǵa, qaıta óńdelgen ónim eksporty 32,4%-ǵa ósti.

11 aıdaǵy ósý boljamy — 9,2%, jyl qorytyndysy boıynsha — 9,3%, jospar boıynsha-4,5%.

2026 jylǵa AÓK-tegi óńdelgen ónimi úlesin 70%-ǵa arttyrý mindeti qoıyldy.

Talqylaý qorytyndysynda Serik Jumanǵarın:

• Ónerkásip jáne qurylys mınıstrligine metallýrgııanyń damýyna áser etetin syrtqy jáne ishki faktorǵa taldaý júrgizip, óndiris pen ınvestıtsııanyń tıimdiligin arttyrý jóninde usynys berýdi;
• Qurylys isteri jónindegi komıtetke qurylys salasyn odan ári damytý jóninde usynys daıyndaýdy;
• Aýyl sharýashylyǵy mınıstrligine AÓK-tegi óńdelgen ónim úlesin 2026 jyly 70%-ǵa deıin jetkizý maqsatyn eskere otyryp, qaıta óńdeý kólemin qosymsha ulǵaıtý jóninde usynys berýdi tapsyrdy.

Budan buryn Jumanǵarın Úkimettiń ınflıatsııany tejeý sharalaryn atady.