Ekonomıkanyń basym sektorlarynda jańa ınvestıtsııalyq jobalar bekitildi
ASTANA. KAZINFORM – Premer-mınıstrdiń birinshi orynbasary Roman Sklıardyń tóraǵalyǵymen Investıtsııalyq shtabtyń kezekti otyrysy ótti. Bul týraly Úkimettiń baspasóz qyzmeti habarlady.
Jıyn barysynda agroónerkásip kesheni, farmatsevtıka jáne azyq-túlik ónerkásibi sııaqty birqatar basym saladaǵy ınvestıtsııalyq bastamalardy júzege asyrýdyń negizgi máseleleri qaraldy. Otyrysqa qatysýshylar Investıtsııalar týraly kelisimderdiń negizgi sharttaryn bekitti.
Olardyń qatarynda Khan Tengri BioPharma, Asyl Sugar, Carlsberg Central Asia, Fabe-Agro kompanııalarynyń, sondaı-aq Túrkistandaǵy maqta ósirý agroónerkásip kesheniniń ınvestıtsııalyq bastamalary bar.
Farmatsevtıka
Khan Tengri BioPharma kompanııasy bıofarmatsevtıkalyq preparattar óndiretin zaýyt salý jobasyn júzege asyrady. Investıtsııa kólemi 103 mlrd teńgeden asatyn bul joba ómirlik mańyzy bar dárilik zattardy óndirý boıynsha ulttyq qýattardy nyǵaıtýǵa jáne 180-nen astam jumys ornyn ashýǵa múmkindik beredi.
Agroónerkásip kesheni
Agroónerkásip salasynda kelesideı jobalar maquldandy:
Asyl Sugar kompanııasy jylyna 200 myń tonnaǵa deıin qant óndirý qýaty bar zamanaýı qant zaýytyn salýdy josparlap otyr. Joba qant qyzylshasyn tereń óńdeýge, ımportty almastyrýǵa jáne elimizdiń strategııalyq azyq-túlik ónimderi boıynsha ózin-ózi qamtamasyz etý deńgeıin arttyrýǵa baǵyttalǵan. Jalpy ınvestıtsııa kólemi – 72 mlrd teńge.
Carlsberg Central Asia óndiristik qýatyn jylyna 340 mln lıtrge deıin ulǵaıta otyryp, sýsyndar óndirisin keńeıtý jobasyn júzege asyrady. Joba aıasynda energııa únemdeıtin tehnologııalar men jańa óndiristik jeliler engiziledi, bul básekege qabiletti ónim shyǵarý kólemin arttyrýǵa múmkindik beredi. Investıtsııa kólemi – 216 mlrd teńge.
Fabe-Agro kompanııasy jylyna 38 myń tonna kókónis óńdeý qýaty bar agroónerkásip keshenin qurady. Keshenniń quramyna jem-shóp, ósimdik maılary jáne basqa da ónimder óndirisi kiredi. Bul shıkizatty jergilikti jerde óńdeýdi damytýǵa jáne ımportqa táýeldilikti azaıtýǵa yqpal etedi. Investıtsııa kólemi – 68 mlrd teńge.
Túrkistandaǵy maqta ósirý agroónerkásip kesheni jylyna 121 myń tonna óndiristik qýaty bar maqtany tereń óńdeý jobasyn júzege asyrady. Bul toqyma ónimderine deıingi tolyq tsıkldi jolǵa qoıýǵa, jańa jumys oryndaryn ashýǵa jáne jeńil ónerkásiptiń damýyna múmkindik beredi. Jalpy ınvestıtsııa kólemi – 58 mlrd teńge.
Atalǵan jobalardyń barlyǵy azyq-túlik qaýipsizdigin arttyrýǵa, aýyl sharýashylyǵy ónimderin tereń óńdeýdi damytýǵa, ımportty almastyrýǵa jáne qosylǵan quny joǵary ónim shyǵarýǵa baǵyttalǵan.
Tamaq ónerkásibi
Otyrysta osylarǵa qosymsha PepsiCo kompanııasynyń tuzdy jeńil taǵamdar óndirý jobasyn ınfraqurylymmen qamtamasyz etý máselesi qaraldy. Mundaǵy josparlanǵan óndiristik qýat jylyna 70 myń tonna daıyn ónimdi, al ınvestıtsııa kólemi shamamen 200 mlrd teńgeni quraıdy. Joba azyq-túlik ónimderiniń eksporttyq áleýeti men óndirisin edáýir keńeıtýge, jańa jumys oryndaryn ashýǵa jáne eldiń azyq-túlik ónerkásibin damytýǵa múmkindik beredi.
Aıta keteıik, 2025 jyldyń 23 qyrkúıeginde Astanada Qazaqstannyń ekonomıkalyq damýyna ulttyq jobalardyń áserin talqylaıtyn aýqymdy is-shara ótedi.