«Ekonomıkany yryqtandyrý jónindegi sharalar týraly» Jarlyq tolyq oryndalmaı otyr — Prezıdent
ASTANA. KAZINFORM — Zańdy kásipkerlerdiń qajetine qaraı beıimdep, mınıstrler men ákimderdiń naqty nátıje úshin jeke jaýapkershiligin kúsheıtken jón. Bul týraly Memleket basshysy Qasym-Jomart Toqaev Qazaqstan halqyna Joldaýynda aıtty.
— Shaǵyn jáne orta bıznestiń ishki jalpy ónimdegi úlesi 40 paıyzǵa, al jumyspen qamtý isindegi úlesi 50 paıyzǵa jýyqtady. Bul — jaman kórsetkish emes. Biraq osy salany júıeli túrde jetildire túspese, ekonomıkany damytý jáne turmys sapasyn jaqsartýǵa tyń serpin bere almaımyz. Eki mıllıonnan astam shaǵyn bıznes sýbektisiniń ishinde ónim óndiretin kásipkerler sany alty paıyzǵa da jetpeıtini jasyryn emes. Orta bızneste bul kórsetkish joǵaryraq bolǵanymen, báribir kóńil kónshitpeıdi, — dedi Memleket basshysy.
Osy rette Prezıdent byltyr «Ekonomıkany yryqtandyrý jónindegi sharalar týraly» Jarlyqqa qol qoıǵanyn eske saldy.
— Bul qujat bıznestiń múddesin eskere otyryp, barynsha ashyq retteý úlgisine kóshýge negiz boldy. Biraq Jarlyq tolyq oryndalmaı otyr. Іsker azamattardyń áleýetin tolyq ashý máselesi kún tártibinen túsken emes. Sondyqtan tıisti quqyqtyq bazany jańǵyrtý kerek. Qazir elimizde 21 kodeks, 300-den astam zań bar. Olarǵa tym kóp túzetý engizilgen. Keıbir normalar bir-birine qaıshy kelip jatady. Túptep kelgende, osynyń bári bıznestiń damýyna kedergi keltirip otyr. Zańnamany túgel tekserip, zerdelep shyqqan jón. Jasandy ıntellekt tehnologııasy muny jyldam ári tıimdi júzege asyrýǵa múmkindik beredi, — dedi Qasym-Jomart Toqaev.
Osy rette Memleket basshysy Strategııalyq josparlaý jáne reformalar agenttiginiń janynan ıntellekt arqyly retteý ortalyǵy qurylatynyn aıtty.
— Bul ortalyq zańnamany retke keltirýmen, túsinikti ári tıimdi usynystar ázirleýmen aınalysady. Zańdy kúrdelendire bermeý kerek. Qaıta ony kásipkerlerdiń qajetine qaraı beıimdep, mınıstrler men ákimderdiń naqty nátıje úshin jeke jaýapkershiligin kúsheıtken jón. Memlekettik organdar bıznes ókilderine eskertý jasaýdyń ornyna áli kúnge deıin tym qatań ákimshilik sheshimder qabyldaıdy degen málimet maǵan da jetip jatady. Mundaı keleńsizdikke jol berýge bolmaıdy. Mindetti talaptar tizimi bıznesti shekten tys tekseristerden qorǵaıtyn mańyzdy quraldyń biri bolýǵa tıis. Qoldanystaǵy normalardyń Kásipkerlik kodekske sáıkestigin qosymsha tekserip, tizimdi tezirek qoldanysqa engizý qajet, — dedi Prezıdent.
Sondaı-aq Memleket basshysy joǵary tehnologııaǵa 1 mlrd dollar ınvestıtsııa tartý týraly baǵdarlama ázirleý qajettigin aıtty.
Aıta keteıik, Joldaýdyń onlaın translıatsııasy Jibek Joly efırinde, sondaı-aq telearnanyń YouTube arnasynda júrip jatyr.
Kazinform saıty tikeleı efırmen qatar, jazbasha translıatsııa da jasaıdy.
Sondaı-aq Joldaý mátinin agenttiktiń telegram arnasynan oqýǵa bolady.