Ekonomıkany damytýǵa 3,7 trln teńge: bıýdjettiń basym bóligi qaıda jumsalady
ASTANA. KAZINFORM — Qazaqstan 2027 jyly ekonomıkanyń naqty sektoryn damytýǵa 3,7 trln teńge baǵyttaýdy josparlap otyr. Qarajat kólik ınfraqurylymyn, aýyl sharýashylyǵyn, ónerkásip pen qurylysty, kásipkerlikti jáne tsıfrlyq damýdy qoldaýǵa jumsalady. Bul týraly Qarjy vıtse-mınıstri Abzal Beısenbekuly aıtyp berdi.
Vıtse-mınıstrdiń aıtýynsha, iri jobalardyń aıaqtalýy men qarjylandyrýdyń balamaly tetikterine kóshý esebinen 2028-2029 jyldary shyǵystar tómendeıdi.
— Shyǵystardyń negizgi kólemi kólik ınfraqurylymyna, aýyl sharýashylyǵyna, ónerkásipke, kásipkerlikke jáne tsıfrlyq damýǵa baǵyttalady. Kólik salasynda avtomobıl ótkizý pýnktteri men shekara bólimsheleriniń qurylysy jalǵasýda. Bul maqsattarǵa 447 mlrd teńge, al respýblıkalyq avtomobıl joldaryna — 105 mlrd teńge kózdelip otyr, — dedi Abzal Beısenbekuly Quryltaıda ótken bıýdjet tanystyrylymynda.
Aýyl sharýashylyǵynda agroónerkásiptik keshen jobalaryn qoldaýǵa 372 mlrd teńge, agroónerkásiptik keshendi qarjylandyrý úshin damý ınstıtýttaryn kapıtaldandyrýǵa — 200 mlrd teńge josparlanǵan.
Ónerkásip pen qurylysty qoldaýǵa 411 mlrd teńge kózdelgen. Qarajat óńdeý ónerkásibin, turǵyn úı-kommýnaldyq sharýashylyq jáne basqa da jobalardy damytýǵa baǵyttalady.
Tsıfrlyq ınfraqurylymdy damytý jalǵasady. Onyń ishinde, joǵary jyldamdyqty ınternetti qamtamasyz etýge jáne ǵarysh salasyndaǵy jańa jobalarǵa basa mán beriledi.
— Biz eńbek ónimdiligin arttyrý úshin jasandy ıntellekt múmkindikterin paıdalanamyz. Mysaly, Halyqaralyq qaıta qurý jáne damý bankiniń qaryzdary esebinen adamı kapıtaldy, kásipkerlikti jáne naryqty damytý jónindegi joba kózdelgen. Joba aqparattyq tehnologııalar qyzmetteriniń ónimdiligi men eksportyn ósirýdiń negizgi tehnologııasy retinde jasandy ıntellektke baǵdarlanǵan. Bul bizge jyl saıyn 6,5 myń maman daıarlaýǵa múmkindik beredi. Qazir kelisim ratıfıkatsııalanyp jatyr, — dedi A. Beısenbekuly.
Osylaısha 2027 jyly naqty sektordyń shyǵystary jalpy alǵanda 2026 jylǵa qaraǵanda 0,6 trln teńgege ulǵaıady.
Aıta keteıik, Qarjy vıtse-mınıstri Abzal Beısenbekuly Quryltaıda «2027-2029 jyldarǵa arnalǵan respýblıkalyq bıýdjet týraly» Zań jobasyn tanystyrdy.
Elimizde kelesi jyly áleýmettik kómekke 6,9 trln teńge bólinedi.
Sondaı-aq, óńirlerdi qoldaýǵa jyl saıyn bıýdjettiń tórtten bir bóligi nemese 7,4 trln teńge (24,8%) jiberiledi.
