Ekonomıkamyzdyń órleý qarqynyn 5 paıyzǵa jetkizýimiz kerek - Álıhan Smaıylov
NUR-SULTAN. QazAqparat – Kelesi jyly jalpy ishki ónim kem degende 2,8 paıyzǵa ósedi. Bul týraly QR Premer-Mınıstriniń birinshi orynbasary Álıhan Smaıylov aıtty, dep habarlaıdy QazAqparat tilshisi.
«Úkimet ekonomıkamyzdyń barlyq salalaryn turaqty kiris kózine aınaldyrýdy kózdep otyr. Degenmen sonyń ishinde eń aldymen óńdeý ónerkásibi, aýyl sharýyshylyǵy, kólik jáne týrızm salalarynyń áleýeti joǵary. Sondyqtan bul baǵyttarǵa basymdyq berilip otyr. Munaı salasyna toqtalsaq, bıylǵy 8 aıdyń qortyndysy boıynsha byltyrmen salystyrǵanda munaı salasynan keletin túsimder 46 paıyzǵa azaıdy nemese 1,6 trln teńgege. Sonyń ishinde byltyrǵa qaraǵanda munaıdy eksporttaýǵa keden bajynyń kólemi 350 mlrd teńgege kem boldy», - dedi Á. Smaıylov Úkimet úıinde ótken baspasóz máslıhatynda.
Onyń sózine qaraǵanda, ekonomıkany turaqtandyrý boıynsha Úkimet tarapynan keshendi jospar iske asyrylyp jatyr.
«Sonymen birge, Memleket basshysynyń tapsyrmalaryna sáıkes, halyqqa jáne bızneske qosymsha kómek berý boıynsha tıisti qadamdar engizilýde. Kelesi jyly jalpy ishki ónim kem degende 2,8 paıyzǵa ósedi dep josparlap otyrmyz. Al orta merzimdi perspektıvada ekonomıkamyzdyń órleý qarqynyn 5 paıyzǵa jetkizýimiz kerek», - dedi QR Premer-Mınıstriniń birinshi orynbasary.
Budan buryn habarlanǵandaı , jaqynda QR Ulttyq ekonomıka mınıstri Rýslan Dálenov aldaǵy 3 jyldaǵy JІÓ boljamyn jarııalaǵan edi.
