Ekonomıkamyzda teńsizdikter áli de saqtalyp otyr - Prezıdent

ASTANA. KAZINFORM –  Elimizdi baqýatty, tipti, baı memleket dep ataýǵa bolady. Bul týraly «Turkistan» gazetine suhbat bergen Memleket basshysy Qasym-Jomart  Toqaev aıtty.

- Men kezinde baspana alý, balalardyń oqý aqysyn tóleý, emdelý úshin zeınetaqy jınaǵyn paıdalanýǵa ruqsat berý týraly sheshim qabyldadym. Kóbisi solaı jasady, bul sheshimge rızashylyqtaryn da bildirip jatty. Biraq, ádettegideı, stomatologııa qyzmetin kórsetemiz degen jeleýmen zeınetaqy qorynan 200 mıllıard teńgeden astam qarjy jymqyrǵan alaıaqtar da tabyldy. Quqyq qorǵaý organdary qazir bul máselemen aınalysyp jatyr. Osy medıtsınalyq qyzmet túrine zeınetaqy jınaǵyn paıdalanýǵa tyıym salýǵa týra keldi. Biraq, basqa da qıturqy tásilder paıda boldy, tipti, plastıkalyq otaǵa tólem jasaıtyndar bar, - dedi Memleket basshysy.

Prezıdenttiń aıtýynsha, bıznes ókilderi jumys oryndaryn ashyp, salyqty adal tóleıdi. Alaıda, nesıe ósiminiń joǵary bolýy, aınalymdaǵy qarajattyń azdyǵy olardyń keń aýqymda damýyna, jańa naryqtarǵa shyǵýyna, zamanaýı tehnologııalardy engizýine múmkindik bermeı tur.

- Ekonomıkanyń qurylymy ózgerip jatyr. Degenmen menińshe, ózgeris qarqyny baıaý. Halyqaralyq qarjy ınstıtýttary men reıtıng agenttikteriniń baǵalaýynsha, elimizdi baqýatty, tipti, baı memleket dep ataýǵa bolady. Bul sózdiń jany bar. Soǵan qaramastan, ekonomıkamyzda teńsizdikter áli de saqtalyp otyr. Onyń bárin shuǵyl rettep, túzý jolǵa salýymyz kerek. Biz bul jaǵdaıdy bilemiz, ony jurttan jasyratyn oıymyz joq. Mundaı qıyndyqty kóptegen memleket basynan ótkerip jatyr. Biz «ósim aýrýy» máselesin mindetti túrde sheshemiz. Naqty josparymyz bar, - dedi Qasym-Jomart Toqaev.

Aıta keteıik, búgin Turkistan» gazetinde Memleket basshysy Qasym-Jomart Toqaevtyń atalǵan basylymnyń bas redaktory, belgili aqyn, pýblıtsıst Baýyrjan Babajanulyna bergen keń kólemdi suhbaty jarııalandy.