Ekonomıkalyq jáne zańgerlik mamandyqtardy daıarlaýǵa eleýli materıaldyq baza qajet bolmaǵandyqtan JOO-lardyń kópshiligi dál osy kategorııaǵa negizdelip otyr
ASTANA. 18 sáýir. QazAqparat - Ekonomıkalyq, zańgerlik, gýmanıtarlyq mamandyqtar boıynsha aqyly túrde oqytý jaǵyna aýytqýshylyq bar. Bul týraly QR Parlamenti Májilisiniń Áleýmettik-mádenı damý komıtetiniń otyrysynda QR Bilim jáne ǵylym vıtse-mınıstri Murat Orynhanov málim etti.
Taratylǵan málimetterge qaraǵanda, búginde Qazaqstandaǵy joǵary oqý oryndarynda 572 myń stýdent bilim alyp jatyr. Osynyń ishinde aqyly túrde oqyp jatqandardyń úlesi 75 paıyzǵa jetip otyr.
«Ekonomıkalyq, zańgerlik, qyzmet kórsetý, gýmanıtarlyq mamandyqtary boıynsha aqyly túrde oqytý jaǵyna aýytqýshylyq bar»,-dedi vıtse-mınıstr.
Belgili bolǵandaı, jekemenshik oqý oryndarynyń 80 paıyzy atalǵan mamandyqtar boıynsha oqytyp jatyr. Atap aıtqanda, osy mamandyqtar aıasynda stýdentterdi oqytý qymbat jabdyqtar men zerthanalyq quraldardy satyp alýdy qajettilik etpeıdi.
«Bul mamandyqtardy daıarlaýǵa aýqymdy materıaldyq-tehnıkalyq baza kerek emes. Sondyqtan da joǵary oqý oryndarynyń kópshiligi dál osy kategorııaǵa negizdelip otyr. Máselen, 63 jekemenshik oqý oryndarynyń 56-sy (88,8 paıyzy) ekonomısterdi, 44 oqý orny zańgerlerdi daıarlaýda», -dedi M. Orynhanov.
Sóz sońynda ol kóptegen jekemenshik joǵary oqý oryndarynda aqyly túrde oqytý bul oqý ornynyń qarjylyq resýrsynyń jalǵyz kózi bolyp tabylatyny, alaıda bul úrdis úzdik álemdik tájirıbege saı kelmeıtinin atap ótti.
