Ekonomıkalyq tergeý qyzmetiniń shtaty 40 paıyzǵa qysqarady - Smaıylov

ASTANA. QazAqparat - QR Qarjy mınıstrligine qarasty Ekonomıkalyq tergeý qyzmetiniń shtaty 40 paıyzǵa qysqaratyn bolady. Bul týraly búgin QR Qarjy mınıstrliginiń keńeıtilgen alqa májilisinde vedomstvo basshysy Álıhan Smaıylov aıtty, dep habarlaıdy QazAqparat tilshisi.

"Ekonomıkalyq tergeý qyzmetin qaıta qurý boıynsha úlken jumys júrgizilip jatyr. Qajetti zańnamalyq normalar qabyldanyp, zańnan týyndaıtyn aktilerdi qabyldaý protsesi aıaqtalýda", - dedi ol.

Onyń aıtýynsha, Ekonomıkalyq tergeý qyzmetinde qarjylyq qylmystardyń aldyn alýǵa, oryn alǵan jaǵdaılar men sebepterdi anyqtaýǵa, kapıtaldy shetelge zańsyz shyǵarýdyń jolyn kesýge jáne kóleńkeli ekonomıkaǵa qarsy kúres jumystaryna ekpin beriledi.

"Shtatyn 40 paıyzǵa qysqartý josparlanyp otyr. Únemdelgen qarajat Ekonomıkalyq tergeý qyzmetindegi jalaqyny kóterýge jumsalatyn bolady", - dedi Á.Smaıylov.

Buǵan deıin habarlaǵanymyzdaı, Qarjy mınıstrliginiń Ekonomıkalyq tergeý qyzmeti Qarjy monıtorıngi komıtetine ótý nátıjesinde qaıta uıymdastyrylatyn bolady.