Ekonomıkalyq tergeý qyzmetiniń qyzmetkeri ar men adaldyqtyń sımvoly

ASTANA. QazAqparat - Jer júzi taǵy bir sulý kóktemdi qarsy alýda! Al onyń eń alǵashqy merekesi 8 naýryz - halyqaralyq áıelder kúni bolǵanynyń ózi de jarasymdy. Osy bir erekshe kúnde qyz-kelinshekterge arnalyp olardyń júrekteriniń jylylyǵy men jandarynyń jomarttyǵy, meıirimdiligi úshin, aınalany kórikti ete túsýge degen qushtarlyǵy úshin aıtylatyn alǵysqa toly áserli sózder erekshe mánge ıe bolmaq.

Osy aıtýly merekede quqyq qorǵaý organdarynda qyzmet etetin názik jandy, qaısar rýhty arýlar úshin kez kelgen azamattyń keýdesin qýanysh kerneıdi. Keshegi Álııa men Mánshúktiń sińilileri  ójet qyzdarymyz otbasynyń uıytqysy bola otyryp, erlermen qatar egemendi elimizdi gúldendirý baǵytynda aıanbaı eńbek etýde.

Solardyń qatarynda QR Qarjy mınıstrliginiń Memlekettik kirister komıteti Ekonomıkalyq tergeý qyzmetiniń sarapshy-ofıtseri Janar Shaıahmetova da bar.
 

Janar Myrzaǵalıqyzy Shyǵys Qazaqstan oblysynda, kıeli de ári qasıetti Abaı elinde dúnıege kelgen. Elimizdiń ekonomıkalyq qaýipsizdigin qorǵaý baǵytynda 18 jyldan astam qyzmet etip kele jatqan Janar tek bilikti maman ǵana emes, kóp balaly ana da. Eńbek jolyn Qazaqstan Respýblıkasy Іshki ister mınıstrligine qarasty Zań ınstıtýtynan bastap, uzaq jyldar respýblıkanyń Kedendik baqylaý komıtetiniń ortalyq apparatynda qyzmet etip keledi. Tyńnan jol taba biletin biliktiliginiń arqasynda podpolkovnık shenine deıin ósip, eseli eńbek etýde. Búgingi kúnde otbasyly, jubaıy Qaırat ekeýi qyzy Nazıra men úsh uldy tárbıelep ósirip otyr.

Ol barlyq sanaly ómir jolyn Otan men halyq múddesine arnap, ózine júktelgen mindetterdi adal atqarǵandyǵynyń, bilimdiligi men biliktiliginiń, tereń rýhanı baılyǵy men parasattylyǵynyń arqasynda jumysynda aıtýly kórsetkishterge qol jetkizip, abyroı men bedelge ıe boldy. 2014 jyldan bastap quqyq qorǵaý organdaryn jańǵyrtýdyń kezekti satysynda jańadan qurylǵan Ekonomıkalyq tergeý qyzmetine aýysyp, osy qyzmettiń qalyptasýyna úlken úlesin qosýda.
 

Jyldar boıǵy eńbektiń arqasynda jumysyna ysylyp alǵan Janar Myrzaǵalıqyzy óz qyzmetin adal da minsiz atqarady desek, artyq aıtqandyq emes. Jumys kúni shekteýsiz. Ýaqytpen sanaspaı, erte kelip, kesh ketý kerek. Asa jaýapty da mańyzdy qyzmet. Osynyń bárine qaramastan Janar tańdaǵan jolynan eshqashan taıynǵan emes. Ekonomıkalyq tergeý qyzmetiniń halyqtyń aldynda bedelin arttyrý, qylmystyq isterdi tııanaqty tergeý úshin qajetti túrli saraptamalardy taǵaıyndaýdy qarjylyq qamtamasyz etý, sapaly kadr saıasatyn júrgizý sekildi tııanaqtylyq pen asa jaýapkershilikti qajet etetin salada óz qyzmetin tabysty atqarýda. Eńbegi de elenip, memlekettiń ekonomıkasyn arttyrýǵa qosqan úlesi úshin «Qazaqstan Respýblıkasynyń Táýelsizdigine 25 jyl» merekelik medalimen marapattaldy.
 

Janar Myrzaǵalıqyzy qyzmetke jańadan qabyldanǵan jas qyzmetkerlerge aqyl-keńesin aıtyp, tájirıbesimen bólisetin bilikti mamandardyń qatarynda. Ekonomıkalyq tergeý qyzmetiniń aldyna qoıylǵan mindetterdi sheshýdegi tolymdy oı-pikirleri men tapqyrlyǵy, áriptesterimen qarym-qatynastaǵy qarapaıymdylyǵy, jumystaǵy árbir berilgen tapsyrmaǵa yjdahatpen zer salyp, janyn berip eńbek etýi sońynan erip kele jatqan jas býyn qyzmetkerlerge ónege bolarlyq qasıet.

«Besigińnen tárbıe bolǵan kezde,

Esigińnen eshbir jaý attamaǵan», - degendeı eliniń, halqynyń erteńin oılaǵan ana retinde ol uldary Meıirhan, Darhan, Baqdáýletti egemendi memleketimizdiń namysy men jigeri keýdesin kernegen azamattary etip tárbıelep, otansúıgishtik, qaısarlyq syndy qasıetterge baýlıdy. Bul sózimizge úlken uly Meıirhannyń Almaty qalasyndaǵy Áskerı akademııanyń 2-shi kýrsynda oqyp jatqany dálel bola alady. Al qyzy Názıra Koreıada halyqaralyq qatynastar salasynda bilim alýda.

Sóz sońynda bilikti qyzmetker, aıaýly ana Janar Myrzaǵalıqyzy sııaqty pogon taqqan arýlardy merekelerimen quttyqtap, eńbekterine tabys, ózderine densaýlyq, otbasylaryna amandyq, tańmen talasa atqan ár kúnderi qýanysh tileımiz.