Ekonomıkalyq ósimdi qalpyna keltirý boıynsha arnaıy memlekettik komıssııa jumys isteýde

NUR-SULTAN. QazAqparat – Ulttyq ekonomıka mınıstri Rýslan Dálenov Qazaqstanda ekonomıkalyq ósimdi qalpyna keltirý boıynsha 2020 jyldyń sońyna deıingi keshendi jospar jáne bıznesti qoldaý boıynsha qosymsha sharalar qabyldanǵanyn málim etti, dep habarlaıdy QazAqparat tilshisi.

«Kásipkerlikti damytý máselesi negizgi basymdyqtardyń biri. Shaǵyn jáne orta bıznesti damytý – ekonomıkany ártaraptandyrý, jumyspen qamtý, makroekonomıkalyq turaqtylyqty qamtamasyz etýdiń, sondaı-aq halyq úshin taýarlar men qyzmetter óndirisiniń basty faktory. Qazirgi jaǵdaıda shaǵyn jáne orta bıznesti qoldaý máselesi ózekti bolyp otyr. Ol úshin salyqtyq yntalandyrýlar berildi. Nesıelendirý keńeıip, bıznesti júrgizý sharttaryn odan ári jeńildetý boıynsha sharalar qabyldanýda», - dedi Rýslan Dálenov Úkimet otyrysynda.

Onyń aıtýynsha 2019 jyly ekonomıkadaǵy shaǵyn jáne orta bıznestiń úlesi 30,8%-dy quraǵan. Ótken jyly ShOB 31,2 trln teńgenń ónimin óndirgen.

«Respýblıka boıynsha 3,4 mln adam shaǵyn jáne orta bıznes salasynda jumys isteıdi. Bıznes klımatty jaqsartý boıynsha qabyldanyp jatqan reformalar Qazaqstannyń Doing Business reıtınginde 25-shi orynǵa kóterilýine múmkindik berdi», - dedi ol.

Rýslan Dálenov kásipkerlikti qoldaý jáne damytý úshin bıznes-klımatty jaqsartý boıynsha birqatar shara qabyldanǵanyn atyp ótti.

«Bul - salyqtyq yntalandyrý, tekserýlerdi qysqartý jáne nesıeleýdi keńeıtý. Sonymen qatar ekonomıkalyq ósimdi qalpyna keltirý boıynsha 2020 jyldyń sońyna deıingi keshendi jospar jáne bıznesti qoldaý boıynsha Qosymsha sharalar qabyldandy. Arnaıy Memlekettik komıssııa jumys isteýde», - dedi ol.