«Ekonomıkalyq nemese saıası jańǵyrý rýhanı jańǵyrýsyz múmkin emes» - respýblıkalyq basylymdarǵa sholý
***
«Egemen Qazaqstan» gazetiniń jazýynsha, Qazaqstan Respýblıkasynyń Prezıdenti Nursultan Nazarbaev resmı saparmen Belarýs Respýblıkasynda boldy. Kelissózder nátıjeleri boıynsha Memleket basshylarynyń Birlesken málimdemesi men úsh úkimetaralyq qujatqa qol qoıyldy. Qol qoıý rásimderi aıaqtalǵan soń memleketter basshylary jýrnalısterge arnap baspasóz máslıhatyn ótkizdi. Nursultan Nazarbaev óziniń sózinde Belorýssııanyń Qazaqstan úshin saıası jáne ekonomıkalyq senimdi áriptes ekenin atap ótti. «Bizdiń elderimiz árqashan da áriptestikti tereńdete túsýdiń barlyq amaldaryn jasaýda. Bıylǵy jyldyń qańtar-aqpan aılarynda bizdiń elderimizdiń arasyndaǵy taýar aınalymy byltyrǵy jyldyń sáıkes merzimimen salystyrǵanda 80 paıyzǵa artty. Bul - turaqty ósimdi kórsetetin fakt. Ekonomıkalyq kooperatsııalanýǵa Keden odaǵy men Birtutas ekonomıkalyq keńistik jańa múmkindikter ashyp otyr. Ekijaqty qatynastardaǵy barlyq máselelerdi de biz dostyq pen tolyq túsinistik rýhynda sheshemiz», dedi Elbasy. Maqala «Tatý eldiń taǵamy da tátti» degen taqyryppen basyldy.
«Ótken jumada Grekııa prezıdenti Karlos Papýlıas premer-mınıstr Lýkas Papadımospen eldiń bólshektenip ketken partııalaryn biriktirýge kúsh salý jóninde talqylaý jasady. Osyǵan oraı prezıdent Karlos Papýlıas partııalar jetekshilerimen kelissóz júrgizip, ultty saqtap qalýdyń tótenshe úkimetin qurýǵa kúsh salatyn bolady», - dep jazady «Egemen Qazaqstan» gazeti. Basylymnyń atap ótýinshe, PASOK sotsıalıstik qozǵalysynyń jetekshisi Evangelos Venızelos eldi basqarýdan úmit kútetin koalıtsııany qurýǵa úshinshi ret talaptanyp, biraq odan eshteńe shyqpaǵannan keıin prezıdenttiń partııalar kóshbasshylarymen kezdesýi koalıtsııalyq úkimetti qurýdyń sońǵy múmkindigi bolyp tabylatyndyǵyn eldegi kóptegen saıasatkerler atap kórsetip otyr. Maqala «Grekııa: koalıtsııalyq úkimet qurýdyń sońǵy múmkindigi» degen taqyryppen berilgen.
***
«Resmı derekke sáıkes, Qazaqstannyń jalpy syrtqy boryshy 123,8 mlrd. dollardy qurap otyr. Bul az ba, kóp pe? Qaryzdyń qurylymyn jik-jikke bólip baıandaǵan Qarjy mınıstri «syrtqy qaryzdan esh qoryqpaý kerek» deıdi», - dep jazady «Alash aınasy» gazeti búgingi sanyndaǵy «Mınıstr qaryz qurylymyn jiktep berdi» degen taqyryptaǵy maqalasynda. Basylymnyń alǵa tartqan derekterine qaraǵanda, eldiń jalpy qaryzy bul kúnde jalpy ishki ónimniń 66,6 paıyzyn qurap otyr eken. Al álemdik qaryzdar arasynda Qazaqstannyń borysh kólemi 36-shy orynǵa turaqtaıdy. Osydan bolar halyq qalaýlysy N.Sabılıanov 2020 jylǵa deıin Qazaqstandy qaryzsyz memleketke aınaldyrý týraly arnaıy baǵdarlama qabyldaý máselesin kótergen.
Búgin - bokstan Qytaıdyń Tsınhýangdao qalasynda ótip jatqan áıelder arasyndaǵy álem birinshiliginiń tórtinshi kúni. Qazaqstan áıelder quramasynyń aǵa bapkeri Vadım Prısıajnıýk dúnıejúzilik dodaǵa barlyq on salmaqta da boksshy aparǵan. Biraq, ókinishke qaraı, júlde jolynda alty-aq boksshymyz qaldy. Dúbirli doda, onda el namysyn qorǵap jatqan sportshylarymyz jaıynda «Alash aınasy» gazetiniń búgingi sanyndaǵy «On arýdyń altaýy aıqasady» degen taqyryppen berilgen maqalada egjeı-tegjeıli baıandalǵan. Aıta keterligi bul birinshilik jarysqa qatysyp jatqan sportshylar sanyn boıynsha buǵan deıingi chempıonattardy áldeqaıda artqa qaldyrǵan. Naqty aıtqanda, AIBA-nyń resmı saıtyndaǵy derekter boıynsha baıraqty básekege álemniń 77 elinen 343 boksshy bas júldege talasýda.
***
«Aıqyn» gazetiniń seısenbilik sanynda saıasatker Erlan Qarınmen aradaǵy suhbat «Ekonomıkalyq nemese saıası jańǵyrý rýhanı jańǵyrýsyz múmkin emes» degen taqyryppen berilgen. Áńgimege Abaı men Tvıtter, Pýtın men ult patrıottary, «Jeteýdiń haty» men «Jaýjúrek myń bala» fılmi arqaý bolǵan. Basylym tilshisiniń barlyq saýalyna tuşymdy jaýap bergen saıasatker: «Qazaq qoǵamyna belgili bir saıasatkerlerdiń urandarynan góri Abaıdyń jáne basqa rýhanı kósemderdiń aıtyp júrgen máseleleri jaqynyraq ári túsinikti. Qazaq qoǵamy aldynda demokratııalyq qundylyqtardy ornatý mindetimen qatar ulttyq sıpatymyzdy saqtap, ony kúsheıtý, ulttyq qundylyqtardy júzege asyrý men olardy qorǵaý sııaqty maqsattar tur», - deıdi.
