Ekonomıkalyq qylmystyń aldyn alýda zańdy tulǵalardyń qylmystyq jaýapkershiligi ınstıtýtyn engizýdiń mańyzy zor - R. Soıer
ASTANA. 1 naýryz. QazAqparat /Qanat Mámetqazyuly/ - Ekonomıkalyq qylmystyń aldyn alýda zańdy tulǵalardyń qylmystyq jaýapkershiligi ınstıtýtyn engizýdiń mańyzy zor.
Búgin QR Parlamenti Májilisinde «QR keıbir zańnamalyq aktilerine zańdy tulǵalardyń qylmystyq jaýapkershiligin engizý máselesi boıynsha ózgerister men tolyqtyrýlar engizý týraly» zań jobasy boıyna ótken «dóńgelek ústel» barysynda Grats ýnıversıtetiniń (Avstrııa) qylmystyq quqyq professory Rııaard Soıer osylaı málim etti.
Sheteldik bilikti sarapshynyń aıtýynsha, Eýropalyq Odaq pen Avstrııa elderinde zańdy tulǵalardy qylmystyq jaýapkershilikke tartý jıi oryn alatyn tájirıbe. Onyń ishinde memlekettiń qatysýymen qurylǵan zańdy tulǵalar da qylmystyq jaýaptylyqqa tartylyp jatady. «Avstrııa zańnamalaryna keletin bolsaq, zańdy tulǵalardy qylmystyq jaýaptylyqqa tartý is júzinde júzege asyrylyp keledi. Áıtse de, buny basqa eldermen salystyrǵanda aıyppuldardyń tym tómendigine qatysty synaıtyndar da barshylyq. Degenmen, statıstıkalyq derekter osynyń ózi de ekonomıkalyq qylmystyń aldyn alýǵa septigin tıgizetindigin kórsetip otyr», - dedi R.Soıer.
Osyǵan qatysty birqatar mysaldardy alǵa tartqan professor, zańnamany jetildirýdegi tájirıbelerdi de atap ótti.
