Ekonomıkalyq qylmys úshin kúdikti qamaýǵa alynbaýy múmkin
ASTANA. QazAqparat - Qazaqstanda ekonomıkalyq qylmys jasady degen kúdikke ilingen adamdar úshin sanktsııalar jeńildetilmek. Búgin Parlament Májilisinde QR Bas prokýrorynyń orynbasary Marat Ahmetjanov osylaı málim etti, dep habarlaıdy QazAqparat.
«Bızneske qysymdy azaıtý úshin ekonomıkalyq qylmystar boıynsha sotqa deıingi qamaýǵa almaıtyn bolamyz. Ondaı qylmystar adamnyń ómirine qaýipti emes. Árıne, reıderlik, jalǵan aqsha jasaý, kontrabanda, qarjy pıramıdalary jáne uıymdasqan qylmystar, qylmystyq toptar oǵan kirmeıdi. Qylmystyq quqyq buzý týraly aryzdar, habarlar, raporttar tirkelmeıdi, eger ókiletti organnan tekserý aktisimen revızııa nemese aýdıtpen zalal ne eleýli zııan kelgeni, zańsyz kiris bolǵany rastalmasa», - dedi M. Ahmetjanov «Qazaqstan Respýblıkasynyń keıbir zańnamalyq aktilerine quqyqtyq qorǵaý qyzmetiniń protsestik negizderin jańǵyrtý máseleleri boıynsha ózgerister men tolyqtyrýlar engizý týraly» zań jobasyn tanystyrý barysynda.
Budan bólek ol múlikti paıdalaný merzimin shekteý máselesine de toqtaldy.
«Qazir tergeýshi menshik ıesiniń múlkin paıdalaný quqyǵyn 10 kúnge shekteı alady. Ol týraly bıznesmen bilmeýi múmkin. Endi tergeýshi bul týraly menshik ıesine 24 saǵat ishinde habarlaýǵa mindetti. 10 kúnnen keıin ol shekteýdi alýǵa mindetti nemes múlikke tyıym salý úshin sotqa barýǵa tıis. Ókinishke qaraı, qazirgi tańda ondaı shekteý joq. Keıde múlik eshqandaı sot sheshiminsiz aılap tyıym salý tártibinde tura beredi»,-dedi Marat Ahmetjanov.
