Ekonomıkalyq kórsetkishter boıynsha kósh bastap turǵan óńirler ataldy

ASTANA. QazAqparat – Qurylys salasynyń ósý qarqyny joǵary deńgeıde. Bul týraly Úkimet otyrysynda Premer-Mınıstr Álıhan Smaıylov aıtty, dep habarlaıdy QazAqparat tilshisi.

«Bıylǵy 9 aıdyń qorytyndysy boıynsha ekonomıkanyń naqty ósýi byltyrdyń tıisti kezeńimen salystyrǵanda 2,8 paıyzdy qurady. Naqty sektordyń damý qarqyny jaqsy. Óńdeý ónerkásibinde ósim – 4,6%. Mashına jasaý salasynda – 7,5%, onyń ishinde avtomobıl jasaýda – 18%. Hımııa ónerkásibinde – 11%, jeńil ónerkásipte – 10%, metallýrgııada - 5% jáne munaı óńdeýde 4% ósim tirkelip, oń dınamıka baıqalyp otyr», - dedi Á. Smaıylov.

Sonymen qatar Úkimet basshysy qurylys salasynyń ósý qarqyny joǵary ekenin, bul turǵyda 5,1% quraǵanyn aıtty. 10,5 mln sharshy metr turǵyn úı paıdalanýǵa berildi.

«Aýyl sharýashylyǵynda ósý qarqyny joǵary –shamamen 7%. Qyzmet kórsetý sektory 2 paıyzǵa ósti. Saýda – 4 paıyzdan astam, kólik 5 paıyzǵa jáne baılanys 7 paıyzǵa jýyq ósti. Negizgi kapıtalǵa salynǵan ınvestıtsııalar ósimi 7 paıyzdy qurady. Onyń ishinde bilim berý, saýda, qurylys salalary men taý-ken ónerkásibinde kórsetkishter joǵary. Óńirler arasynda 9 aıdaǵy negizgi ekonomıkalyq kórsetkishter boıynsha Aqmola, Jambyl, Qostanaı, Soltústik Qazaqstan oblystary men Almaty jáne Shymkent qalalary kósh bastap keledi», - dedi Premer-Mınıstr.