Ekonomıkalyq konsýltanttar keńesiniń kezekti otyrysy ótti
ASTANA. 13 qarasha. QazAqparat - Búgin Úkimet úıinde Qazaqstan Respýblıkasynyń Premer-Mınıstri Kárim Másimov QR Úkimeti janyndaǵy Ekonomıkalyq konsýltanttar keńesiniń kezekti otyrysyn ótkizdi, dep habarlaıdy QR Úkimetiniń baspasóz qyzmeti.
QR Úkimet basshysynyń baspasóz qyzmeti habarlaǵandaı, Keńes otyrysynda ekonomıka ǵylymdarynyń doktory Rahman Alshanovtyń «Qazaqstannyń jahandaný sharttaryndaǵy agroónerkásiptik saıasaty» taqyrybyndaǵy baıandamasy tyńdalyp, talqylandy. Baıandamada elimizdiń agronónerkásiptik keshenindegi qazirgi jaǵdaıyna baǵa berilip, sonymen qatar Qazaqstannyń aýyl sharýashylyǵynyń óndirisi men básekege qabiletiligin joǵarylatýǵa qajeti sharalar usynylǵan.
Baıandamany talqylaýǵa QR aýyl sharýashylyq mınıstri Aqylbek Kúrishbaev, QR Indýstrııa jáne jańa tehnologııalar mınıstrliginiń birinshi vıtse-mınıstri Albert Raý, ekonomıka ǵylymdarynyń doktory, professor Arystan Esentúgelov, QR Bilim jáne ǵylym mınıstrligi Ekonomıka ınstıtýtynyń dırektory Orazaly Sábden jáne t.b qatysty.
Sonymen qatar Keńes músheleri Ekonomıkalyq jáne qarjylyq kúızelisterdi erte anyqtaý ortalyǵynyń dırektory Sara Alpysbaevanyń ındýstrııalandyrýdyń basym baǵyttaryn esepke alǵandaǵy Qazaqstan Respýblıkasynyń Keden Odaǵy elderimen saýda balansy ustanymyn kúsheıtý bolashaǵy jáne onyń qazirgi jaǵdaıyna baǵa berilgen baıandamasyn tyńdap, talqyǵa túsirdi.
Pikirtalasqa QR Ekonomıkalyq damý jáne saýda vıtse-mınıstri Qýandyq Bıshembaev, «Qazaqstan qarjygerleriniń qaýymdastyǵy» zańdy tulǵalar birlestiginiń tóraǵasy Serik Ahanov, QR salyq tóleýshiler odaǵynyń tóraǵasy Jannat Ertilesova, «Atameken Odaǵy» Ulttyq ekonomıkalyq palata tóraǵasynyń birinshi orynbasary Ekaterına Nıkıtınskaıa, «Úkimet pen QR Ulttyq Banki janyndaǵy ulttyq saraptama ortalyǵy» AQ basqarma tóraǵasy Aıana Manasova, Qazaqstan-Brıtan tehnıkalyq ýnıversıtetiniń ekonomıka kafedrasy meńgerýshisi Nurlan Nurseıit pen «STAN Holding» kompanııasynyń vıtse-prezıdenti, fızıka-matematıka ǵylymdarynyń doktory Qanat Ospanov qatysty.
Ekonomıkalyq konsýltanttar keńesi ózekti áleýmettik-ekonomıkalyq máseleler boıynsha aldyńǵy qatarly qazaqstandyq sarapshylardyń qatysýymen konsýltatsııalar ótkizý maqsatynda 2008 jyldyń qarashasynda QR Premer-Mınıstri Kárim Másimovtiń bastamasy boıynsha qurylǵan bolatyn. Keńes quramyna bedeldi qazaqstandyq ǵalymdar, ekonomıster men ǵylymı-zertteý ortalyqtarynyń ókilderi kiredi.
