Ekonomıkalyq qatynastardyń jan-jaqty damýy azamattyq zańnamany jetildirýdi talap etedi - N. Ábdirov
ASTANA. QazAqparat - Ekonomıkalyq qatynastardyń jan-jaqty damýy azamattyq zańnamany jetildirýdi talap etedi.
Búgin Parlament Májilisinde «Qazaqstan Respýblıkasynyń keıbir zańnamalyq aktilerine azamattyq zańnamany jetildirý máseleleri boıynsha ózgerister men tolyqtyrýlar engizý týraly» zań jobasynyń tanystyrylymy barysynda Zańnama jáne sot-quqyqtyq reformalar komıtetiniń tóraǵasy Nurlan Ábdirov osylaı málim etti.
Depýtattyń aıtýynsha, zań jobasy Qazaqstan Respýblıkasynyń 2010-2020 jyldarǵa arnalǵan quqyqtyq saıasat tujyrymdamasyn iske asyrý maqsatynda ázirlengen. Sonymen qatar, qujat qoldanystaǵy ulttyq azamattyq zańnamany jetildirýdi kózdeıdi.
«Azamattyq quqyq halyq úshin qashanda mańyzdy, bul keńinen taralǵan jáne árbir adamǵa etene jaqyn quqyq bolyp tabylady. Óıtkeni, azamattyq qarym-qatynas elimizdiń árbir jeke jáne zańdy tulǵalarynyń kúndelikti ómirinde kezdesedi. Al Qazaqstannyń azamattyq quqyǵy óziniń damýynyń birneshe satysynan ótti. Qoldanystaǵy Azamattyq kodeks taýarly-aqshalaı qatynastardyń, menshik túriniń teńdiligin, oǵan qol suǵylmaýshylyqty, mámile men sharttar erkindigin retteýdiń negizgi qaǵıdattaryn qamtyǵan iri kodıfıkatsııalanǵan akti bolyp tabylady. Sondyqtan da, qoldanystaǵy kodeks elimizde naryqtyq qatynastardyń damýyna qolaıly jaǵdaı jasap, sheteldik ınvestıtsııa tartýǵa da óz septigin tıgizdi. Alaıda, ekonomıkalyq qatynastardyń odan ári damýy, sheteldik ınvestıtsııalar aǵyny, aqparattyq jáne zııatkerlik tehnologııalardyń shapshań damýy elimizdiń ulttyq zańnamasyna ózgerister engizýdi talap etip otyr», dedi Májilistiń Zańnama jáne sot-quqyqtyq reformalar komıtetiniń tóraǵasy Nurlan Ábdirov.
Depýtattyń paıymynsha, jeke menshikke quqyqtyń qazirgi damý satysynda eń birinshi kezekte jarııa quqyqtyq jáne jeke quqyqtyq qatynastardy retteý mańyzdy bolyp sanalady.
«Usynylyp otyrǵan jańa zań jobasy adamnyń azamattyq quqyqtaryn qorǵaýdyń tıimdi quralyna aınalýy kerek», dedi komıtet basshysy.
