Ekonomıkalyq damý jáne saýda mınıstrligi strategııalyq, ortamerzimdi damý jumysyn úılestiretin organ bolýy shart - Elbasy
ASTANA. 17 sáýir. QazAqparat /Qanat Mámetqazyuly/ - Ekonomıkalyq damý jáne saýda mınıstrligi strategııalyq, ortamerzimdi damý jumysyn úılestiretin organ bolýy shart. Búgin Úkimette ótken keńeste Memleket basshysy Nursultan Nazarbaev osylaı málim etti.
«Memlekettik jáne qoǵamdyq ınstıtýttardyń tıimdiligin arttyrý qajet. Bizdiń óz basymyzdan ótken tájirıbemizge úńilsek, myqty memleket, tıimdi memlekettik saıasat, bilikti kadrlar - mine, bizdiń strategııalyq josparlardyń úsh bazalyq sharty osylar ekendigin kóremiz. Bul rette, birinshiden, men memlekettik basqarý júıesin jetildirýge baǵyttalǵan birqatar jarlyqtarǵa qol qoıdym. Ekonomıkalyq damý jáne saýda mınıstrligine básekelestikti qorǵaý saıasaty, monopolııalyq qyzmetti shekteý, tarıftik, salyqtyq, kedendik saıasattar beriledi. Óńirlik damý men kásipkerlikti qoldaýdy úılestirý fýnktsııalary kúsheıtiledi. Biz bul mınıstrlikti negizinen uzaqmerzimdi, ortamerzimdi strategııalardy ázirleý úshin qurǵan edik. Mınıstrlikter arasyndaǵy jumysty úılestirip, óńirlerdi damytýǵa kómek bolsyn dedik. Biraq, olaı bolmaı, sońǵy kezde tek saýda mınıstrine aınalyp ketti. Sondyqtan da, atalǵan mınıstrlik strategııalyq, ortamerzimdi damý men barlyq vedomstvo jumysyn úılestiretin ortalyq organ bolýy tıis», - dedi Prezıdent.
Sonymen qatar, Elbasy Ulttyq bankke qarjylyq qadaǵalaý, qarjy naryǵyn retteý, Almaty qalasynyń óńirlik qarjy ortalyǵyn damytý fýnktsııalary júkteletinin eske saldy. «Bul sharalar strategııalyq-ekonomıkalyq josparlaýdyń ózara baılanysyn kúsheıtedi jáne memlekettiń ekonomıkalyq saıasatyn retteıdi», - dedi N. Nazarbaev.
