Ekonomıkalyq damý baǵytynda ınnovatsııalarǵa ekpin qoıý kerek - Tóleýtaı Raqymbekov

NUR-SULTAN. QazAqparat – Ekonomıkalyq damý - ınnovatsııany engizýge baılanysty. Bul týraly Ulttyq qoǵamdyq senim keńesiniń múshesi, Ulttyq agrarlyq ǵylymı bilim berý ortalyǵynyń basqarma tóraǵasy Tóleýtaı Raqymbekov málim etti, dep habarlaıdy QazAqparat tilshisi.

«Búgin Ulttyq qoǵamdyq senim keńesiniń úshinshi otyrysy ótip, halyqtyń kókeıinde júrgen máseleler kóterildi. Osy oraıda bilim men ǵylym, sondaı-aq densaýlyq saqtaý salasyna qatysty tıisti tapsyrmalar júkteldi. Bul turǵyda otyrys barysynda áriptesterim, sarapshylar biraz pikirlerin aıtty. Sonymen qatar, osyǵan daıyndalyp ǵylym salasyna qatysty óz usynystarymdy jetkizgen edim. Otyrystaǵy sózinde Prezıdent Qasym-Jomart Toqaev atalǵan salalar boıynsha tıisti tapsyrmalar berdi», - dedi T. Rahymbekov «QazAqparat» agenttigine bergen suhbatynda.

Osy oraıda ol Memleket basshysynyń jyl saıyn ǵalymdardyń álemdegi jetekshi zertteý ortalyqtarynda ǵylymı taǵylymdamadan ótýine qarjy bólý týraly tapsyrmasyn qoldaıtynyn jetkizdi.

«Damyǵan elderdiń ǵylymı ortalyqtarynda ǵalymdarǵa taǵylymdamadan ótýge memleket tarapynan qoldaý jasaý mańyzdy. Ǵalymdar tájirıbe almaspasa, onda bul baǵyttaǵy damý protsesteri tejelip qalatyny anyq. Bilim salasyna eleýli qoldaý jasalyp jatqany belgili, degenmen ǵylym baǵytyna aıryqsha nazar aýdarý kerek. Ekonomıkalyq damý - eń aldymen ınnovatsııany engizýge baılanysty. Al ınnovatsııa ǵylymı jetistikter arqyly keledi. Sondyqtan osy baǵytqa erekshe ekpin qoıǵan jón», - dedi Tóleýtaı Raqymbekov.

Sonymen qatar ol elimizde aýyl sharýashylyǵy salasyn kadrmen tolyq qamtý úshin mamandandyrylǵan 3 agrarlyq ýnıversıtetke tıisti múmkindikterdi jasaý kerektigin atap ótti.

Budan buryn habarlanǵandaı , Ulttyq qoǵamdyq senim keńesiniń múshesi Tóleýtaı Raqymbekov aýyldy jerlerde ınnovatsııany damytý úshin bilimniń ulttyq júıesin qurý boıynsha baǵdarlama ázirleýdi usynǵan edi.

Aıta keteıik, Ulttyq qoǵamdyq senim keńesiniń 3-otyrysynda QR Prezıdenti Qasym-Jomart Toqaev dıplom basyp bere beretin joǵary oqý oryndaryn jabý qajettigin aıtqan bolatyn.

Prezıdent ǵylymnyń qandaı baǵyttary qarjylandyrylatynyn aıtty.

Memleket basshysy jyl saıyn keminde 100 ǵalymnyń álemdegi jetekshi zertteý ortalyqtarynda ǵylymı taǵlymdamadan ótýine qarjy bólý kerektigin atap ótti.

Sonymen qatar Q. Toqaev doktoranttardyń stıpendııasyn kóbeıtýdi tapsyrdy.