Ekonomıkalyq áleýeti tómen jáne joǵary aýyldyq eldi mekenderdi anyqtaýǵa arnalǵan ólshemder bekitildi
ASTANA. 13 tamyz. QazAqparat /Qanat Mámetqazyuly/ - Keshe 12 tamyzda QR Ekonomıkalyq damý jáne saýda mınıstrligi men QR Aýyl sharýashylyǵy mınıstrligi birlesken buıryq boıynsha Ekonomıkalyq áleýeti tómen jáne joǵary aýyldyq eldi mekenderdi anyqtaýǵa arnalǵan ólshemderdi bekitti.
Qazaqstan Respýblıkasy Úkimetiniń 2011 jylǵy 18 shildedegi № 817 qaýlysymen bekitilgen Jumyspen qamtýǵa járdemdesýdiń belsendi sharalaryna qatysatyn adamdardyń utqyrlyǵyn arttyrýǵa járdemdesý jáne olarǵa memlekettik qoldaý sharalaryn kórsetý qaǵıdasyna sáıkes ekonomıkalyq áleýeti tómen jáne joǵary aýyldyq eldi mekenderdi anyqtaýǵa arnalǵan ólshemder bekitilip, ári qaraı ekonomıkalyq áleýeti tómen jáne joǵary aýyldyq eldi mekenderdiń tizbesin ýaqtyly kelisý boıynsha qajetti sharalar qabyldanady. Baspasóz qyzmetiniń keltirgen derekterine qaraǵanda, ekonomıkalyq áleýeti tómen jáne joǵary aýyldyq eldi mekenderdi anyqtaý ólshemderi 21 jıyntyq kórsetkishterdi qamtıtyn 4 top boıynsha qamtylǵan. Atap aıtqanda: ekonomıkalyq, sondaı-aq ekonomıkalyq ólshemderdi tolyqtyratyn ınjenerlik-ınfraqurylymdyq, áleýmettik jáne ekologııalyq ólshemder aıqyndalǵan. Osyǵan oraı, aýyldyq eldi mekender áleýetin baǵalaý kezinde ekonomıkalyq damýdyń basymdylyqtaryn eskere otyryp, kórsetkishterdiń árqaısysy ballmen baǵalanady. Balldardyń jıyntyq sany somasynda olardyń mańyzdylyǵyn sıpattaıtyn kórsetkish belgilendi. Eń úlken kórsetkish ekonomıkalyq blokqa keledi - eń úlken jıyntyq baly 60. Al ınjenerlik-ınfraqurylymdyq bloktyń kórsetkishteri 30 balldan aspasa, áleýmettik bloktyń sıpattamalary 10 ballǵa deıingi kórsetkishke ıe. Al aýyldyq eldi mekenniń damý deńgeıine ekologııalyq bloktyń áseri túzetý koeffıtsıentteri arqyly baǵalanady, olarǵa alǵashqy úsh blok boıynsha alynǵan baldar kóbeıtiledi. Sóıtip barlyq jikteý faktorlary boıynsha kórsetkishter árbir aýyldyq eldi meken bólinisinde ballmen aıqyndalady. Ólshemderdiń úsh blogy boıynsha jınaqtalǵan aýyldyq eldi meken balldarynyń jıyntyq somasy ekologııalyq blok boıynsha túzetý koeffıtsıentine kóbeıtiledi jáne aýyldyq eldi mekenniń ekonomıkalyq áleýetin sıpattaıtyn jıyntyq balldy aıqyndaıdy. Al balldardyń jıyntyq somasynyń negizinde aýyldyq eldi mekender úsh sanatqa bólinedi. Atap aıtqanda, birinshi sanat: ekonomıkalyq damý áleýeti joǵary aýyldyq eldi mekender. Bularldyń jıyntyq baly 70-ten joǵary. Ekinshi sanat -ekonomıkalyq damý áleýeti ortasha aýyldyq eldi mekender - 70 ballǵa deıin. Úshinshisi - ekonomıkalyq damý áleýeti tómen aýyldyq eldi mekender - 1-34 ball.
