Ekonomıkalyq tergep-tekserý qyzmeti laýazymdaryna qoıylatyn talaptarǵa ózgeris engizildi
ASTANA. KAZINFORM – QR Qarjylyq monıtorıng agenttiginiń tóraǵasy Janat Elımanov ekonomıkalyq tergep-tekserý qyzmeti laýazymdarynyń sanattaryna qoıylatyn biliktilik talaptaryna ózgeris engizdi.
Ózgeriske sáıkes, ekonomıkalyq tergep-tekserý qyzmeti laýazymdarynyń sanattaryna qoıylatyn biliktilik talaptarynyń qazaq tilindegi nusqasy eskertpemen tolyqtyryldy.
– Kásibı daıarlyǵy joǵary, ózindik ereksheligi bar bilimi nemese belgili bir mamandyqtar boıynsha edáýir jumys tájirıbesi bar adamdar úlgilik biliktilik talaptarynda belgilengen qajetti jumys ótilin eskermesten, quqyq qorǵaý organynyń birinshi basshysynyń sheshimi jáne (nemese) kelisimi boıynsha quqyq qorǵaý organdarynyń laýazymdaryna taǵaıyndalýy múmkin, – delingen qujatta.
Sondaı-aq kadr qyzmetteriniń basshylyq laýazymdary boıynsha fýnktsıonaldyq mindetterdi oryndaý úshin personaldy basqarý (HR) salasynda sertıfıkattyń bolýy talap etiledi.
Aıta keteıik, Qarjylyq monıtorıng agenttiginiń tóraǵasy Janat Elımanov Prezıdentke vedomstvonyń 2025 jyly atqarǵan qyzmetiniń basty nátıjeleri men aldaǵy kezeńge arnalǵan mindetteri jóninde esep bergen edi.