Ekonomıkalyq reforma: Qazaqstan Dúnıejúzilik bankpen birlesken jospar ázirleıdi
ASTANA. KAZINFORM — Qazaqstan men Dúnıejúzilik bank ekonomıkalyq reformalar boıynsha birlesken is qımyl josparyn daıyndaıdy, dep habarlaıdy Úkimettiń baspasóz qyzmeti.
Qazaqstan Respýblıkasy Premer-mınıstriniń orynbasary — ulttyq ekonomıka mınıstri Serik Jumanǵarın Dúnıejúzilik banktiń Qazaqstandaǵy Turaqty ókili Andreı Mıhnevpen jáne uıymnyń halyqaralyq sarapshylarymen jumys kezdesýin ótkizdi.
Kezdesý QR Premer-mınıstri bastamashylyq etken birqatar talqylaýlardyń jalǵasy retinde tolyǵymen jańa ınvestıtsııalyq tsıkldy júzege asyrý, uzaq merzimdi kapıtal tartý, ekonomıkanyń ónimdiligin arttyrý jáne odan arǵy qurylymdyq reformalar úshin tájirıbe tetikterin daıyndaý máselelerine arnaldy.
Talqylaýǵa Ulttyq ekonomıka, Qarjy, Syrtqy ister, Jasandy ıntellekt jáne tsıfrlyq damý mınıstrlikteriniń, sondaı-aq basqa da múddeli memlekettik organdar men kvazımemlekettik sektordyń ókilderi qatysty.
Kezdesý barysynda Dúnıejúzilik banktiń sarapshylary Qazaqstannyń memlekettik sektorynyń derekterine negizdelgen bolashaq taldamalyq eseptiń qurylymyn usyndy. Talqylaýdyń ózegi Ekonomıkanyń joǵary ónimdilikke, tehnologııalyq jańarýǵa jáne halyq tabysynyń ósýine sapaly túrde kóshýine baǵdarlanǵan «3I» modeli boldy. Onyń ataýy aǵylshyn tilindegi ınvestıtsııa, yqpaldasý jáne ınnovatsııa sózderinen quralǵan.
Esepti tanystyrý sheńberinde memlekettik shyǵysty josparlaýdy jetildirýge jáne áleýmettik qoldaýdyń belsendi sharalaryn damytýǵa aıtarlyqtaı kóńil bólindi. Sarapshylar Qazaqstandaǵy tsıfrlandyrýdyń joǵary deńgeıin atap ótti. Bul memlekettik kómekti barynsha jedel, dálme-dál jáne oǵan naǵyz muqtaj azamattardyń sanatyna kórsetýge múmkindik beredi.
Kásipkerlikti qoldaý quraldaryn talqylaý kezinde sarapshylar «Damý» qorynyń baǵdarlamalaryna taldaý jasap, ShOB kásiporyndaryn jumyspen qamtýdy arttyrý men jańǵyrtýdyń draıveri retinde ishinara nesıelik kepildik berý tetiginiń joǵary tıimdiligin atap ótti.
Kezdesý qorytyndysynda taraptar bastamalardy taldamalyq usynymdardan is júzine asyrýǵa kóshý týraly ýaǵdalasty. Ulttyq ekonomıka mınıstrligi, Strategııalyq josparlaý jáne reformalar jónindegi agenttigi jáne basqa da vedomstvolarmen birlesip, keshendi is-qımyl josparyn daıyndaýmen aınalysatyn birlesken jumys toby qurylady.
— Keńes berý protsesi biz úshin mańyzdy. Usynylǵan shara árbir salalyq mınıstrlikpen, jergilikti atqarýshy organmen egjeı-tegjeıli talqylanyp, olardyń aǵymdaǵy mindeti de tolyq eskerilýi mańyzdy. Óńirlerdi tolyqqandy tartý qazirdiń ózinde jergilikti erekshelikterdi dálirek anyqtap, ár oblys úshin qoldanbaly quraldy ázirleýge múmkindik beredi. Biz ony joǵary deńgeıde talqylaǵannan keıin, kelisilgen jalpy strategııa retinde usyný úshin qyrkúıek-qazanǵa arnalǵan is-qımyl josparynyń jobasyn birlesip daıyndaımyz degen úmittemiz, — dedi Andreı Mıhnev.
QR Premer-mınıstriniń orynbasary — ulttyq ekonomıka mınıstri Serik Jumanǵarın óz kezeginde birlesken jumystyń strategııalyq basymdyqtaryn atap ótti.
— Bizdiń basty mindetimiz — tereń ekonomıkalyq taldaýdy praktıkalyq jáne túsinikti sharalarǵa kóshirý. Memleket basshysy aıtyp otyrǵan jańa ınvestıtsııalyq tsıkl bizden belsendi tásilderdi talap etedi. Biz uzaq merzimdi jeke kapıtal úshin barynsha tartymdy jaǵdaı jasaýdy, tehnologııalyq jańarý úshin kedergilerdi alyp tastaýdy jáne otandyq bızneske damýdyń pármendi quraldaryn usynýdy kózdeımiz. Dúnıejúzilik bankpen birlesken is-qımyl jospary júrgizilip jatqan qurylymdyq reformalardyń sabaqtastyǵyn qamtamasyz etetin jáne sapaly ekonomıkalyq ósýdiń negizin qalaıtyn naqty baǵdarǵa aınalady, — dep atap ótti vıtse-premer.
Budan buryn Oljas Bektenov Dúnıejúzilik bank ókilderimen jańa ınvestıtsııalyq tsıkldy talqylaǵanyn jazǵanbyz.
