Ekonomıkalyq ósimniń proaktıvti saıasaty eniziledi – Jumanǵarın

ASTANA. KAZINFORM – Ekonomıkalyq ósimniń proaktıvti saıasatyn engizý boıynsha jumys júrgizilip jatyr. Bul týraly Úkimet otyrysynda Premer-mınıstrdiń orynbasary – Ulttyq ekonomıka mınıstri Serik Jumanǵarın aıtty.

– Birqatar perspektıvaly baǵyt aıqyndaldy. Tabıǵı resýrstardy qaıta óńdeý jáne agroónerkásiptik keshen ónimderin qaıta óńdeý salalary ekonomıkaǵa áseriniń joǵary bolýyna baılanysty basym baǵyttar retinde belgilendi, - dedi Serik Jumanǵarın.

Osy rette vıtse-premer eń aldymen myna baǵyttardy atap ótti:

– barlyq negizgi tústi metaldar;

– qara metallýrgııa;

– sırek kezdesetin metaldar;

– hımııa ónerkásibi;

– munaı-hımııa;

– gaz óndirisi;

– agroónerkásip ónimderin joǵary jáne orta deńgeıde qaıta óńdeý;

– farmatsevtıka ónerkásibi.

– Atalǵan jobalardy iske asyrý eldegi eńbek ónimdiliginiń ortasha deńgeıin arttyrady. Bul «orta tabys tuzaǵyn» eńserý jáne jan basyna shaqqandaǵy jalpy ishki ónimniń odan ári ósý úshin qajet negizgi sharttardyń biri sanalady. Osyǵan baılanysty búgingi kúni Ekonomıkalyq ósimniń proaktıvti saıasatyn engizý boıynsha jumys júrgizilýde. Bul saıasattyń máni – memlekettiń tek ınvestorlardy shaqyrýymen ǵana shekteletin modelden naqty ınvestıtsııalyq jobalardy qalyptastyrý men iske qosýǵa memlekettiń belsendi qatysýy modeline kóshý. Investıtsııa tartýdyń bul tásili ekonomıka salalarynyń naqty qajettilikterine baǵyttalǵan. Sonymen qatar jobalardyń tıimdiligi men tabystylyǵyn arttyrý maqsatynda quzyretteri myqty jáne tehnologııalary zamanaýı jetekshi sheteldik strategııalyq seriktesterdiń qatysýy qamtamasyz etiledi, - dedi ol.

Aıta keteıik, Úkimet otyrysynda ekonomıkany odan ary ártaraptandyrý tásilderi pysyqtalyp jatyr.