Ekonomıkalyq ósimi jedeldeı me: Halyqaralyq valıýta qory jańa boljamyn jarııalady

ASTANA. KAZINFORM — Halyqaralyq valıýta qory Qazaqstan ekonomıkasynyń qazirgi ahýalyna oń baǵa berip, 2027 jyly ósim qarqyny jedeldeýi múmkin ekenin málimdedi. 2026 jyldyń alǵashqy 10 aıynda eldiń jalpy ishki ónimi 4,5%-ǵa ósken. Bul týraly Úkimet málim etti.

Ekonomıkalyq ósimi jedeldeı me: Halyqaralyq valıýta qory jańa boljamyn jarııalady
Foto: Úkimet

Qazaqstan Respýblıkasynyń Premer-mınıstri Oljas Bektenov Halyqaralyq valıýta qory (HVQ) mıssııasynyń Qazaqstan boıynsha basshysy Amına Lareshpen kezdesti. Jıynda Qor mıssııasynyń qorytyndysy shyǵarylyp, Qazaqstan men HVQ arasyndaǵy ózara is-qımyldyń jaqyn jáne orta merzimdi kezeńdegi perspektıvalary talqylandy.

Premer-mınıstr elimizde júrgizilgen ınstıtýtsıonaldyq reformalar týraly habardar etti. Shilde aıynda Ádiletti ári Kúshti Qazaqstannyń negizin qalaǵan Konstıtýtsııa kúshine endi. Úkimet Memleket basshysy Qasym-Jomart Toqaevtyń tapsyrmalaryn júzege asyrý aıasynda tsıfrlyq ekonomıkany damytý jáne ekonomıkalyq ósýdiń jańa kózderin qalyptastyrý baǵytyn júzege asyrýdy jalǵastyra bermek.

Elimizdiń ekonomıkalyq saıasatyn jetildirý úshin halyqaralyq tájirıbeni paıdalanýdyń jáne HVQ-men saraptamalyq dıalog júrgizýdiń mańyzdylyǵy atap ótildi.

Ekonomıkalyq ósimi jedeldeı me: Halyqaralyq valıýta qory jańa boljamyn jarııalady
Foto: Úkimet

— Bizdiń dıalog turaqty mıssııalar men maqsatty konsýltatsııalar jáne HVQ tarapynan memlekettik organdarǵa tehnıkalyq kómek kórsetý sharalary aıasynda jalǵasýda. Osy mıssııanyń qorytyndylary boıynsha usynystar elimizdiń makroekonomıkalyq jáne makroprýdentsıalyq saıasatyn odan ári jetildirý úshin paıdaly baǵdar bolady dep senemin, — dep atap ótti Oljas Bektenov.

Amına Laresh mıssııa jumysynyń qorytyndysyn jarııa ete otyryp, Qazaqstandaǵy makroekonomıkalyq ahýalǵa oń baǵa berdi.

Ekonomıkalyq ósimi jedeldeı me: Halyqaralyq valıýta qory jańa boljamyn jarııalady
Foto: Úkimet

— Biz Qazaqstanǵa Prezıdent halyqqa Joldaýyn jarııalap, ınfraqurylymdy damytý jáne adam kapıtalyna salynatyn ınvestıtsııalardyń mańyzdy basymdyqtaryn belgilep bergennen keıin kóp uzamaı keldik. Qazaqstannyń ekonomıkalyq áleýetiniń zor ekenin atap ótkimiz keledi. Bizdiń aramyzdaǵy dıalog pen usynylyp otyrǵan usynymdar azamattardyń qajettilikterin eskere otyryp, turaqty ekonomıkalyq ósýdi qamtamasyz etýge yqpal etedi dep úmittenemiz, — dep atap ótti HVQ mıssııasynyń Qazaqstan boıynsha basshysy.

HVQ-nyń qazan aıyndaǵy boljamyna sáıkes, Qazaqstan ekonomıkasy 2026 jyldyń qorytyndysy boıynsha turaqty ósim kórsetýdi jalǵastyrady, al kelesi jyly ekonomıkalyq ósim qarqyny jedeldeı túsedi. Qordyń málimetinshe, Ortalyq Azııa elderi, sonyń ishinde Qazaqstan, júrgizilip jatqan reformalardyń nátıjesinde syrtqy faktorlarǵa turaqtylyǵyn saqtap otyr. Damýdyń basymdyqtary baǵa turaqtylyǵy, aqsha-nesıe jáne bıýdjettik saıasatty úılestirý, bıýdjettik rezervterdi qalpyna keltirý jáne saýdany ártaraptandyrý bolyp sanalady.

2026 jyldyń 10 aıynyń qorytyndysy boıynsha JІÓ ósimi 4,5%-dy qurady, negizgi kapıtalǵa salynǵan ınvestıtsııalar kólemi 4,9%-ǵa artyp, 18,3 trln teńgege deıin ulǵaıdy. Ónerkásip pen aýyl sharýashylyǵynda oń dınamıka baıqaldy, bul rette eń joǵary ósý qarqynyn mashına jasaý (22,2%) jáne farmatsevtıka (50,9%) kórsetti. Aýyl sharýashylyǵy 5,2%-ǵa ósti.

Kezdesý sońynda Úkimettiń syndarly dıalogti qoldaýǵa jáne perspektıvaly salalarda Qormen ózara tıimdi yntymaqtastyqty tereńdetýge daıyndyǵy rastaldy. HVQ-nyń barlyq usynystary men usynymdaryn salalyq memlekettik organdar zertteıdi.