Ekonomıkalyq ósim keıingi 10 jyldaǵy eń joǵary kórsetkishke jetti - Rýslan Jeldibaı
ASTANA. KAZINFORM - Bul týraly QR Prezıdentiniń kómekshisi - Baspasóz hatshysy Rýslan Jeldibaı óziniń Telegram paraqshasynda jyl qorytyndysyna baılanysty jarııalaǵan jazbasynda aıtylǵan.
- 2025 jyldyń qorytyndysy boıynsha ekonomıkalyq ósim 6 paıyzdan asady dep kútiledi. Bul – sońǵy on jyldaǵy eń joǵary kórsetkish. Qazaqstan tarıhynda tuńǵysh ret ishki jalpy ónim kólemi 300 mıllıard dollardan asady. Ol jan basyna shaqqanda 15 myń dollardan keledi,-dep jazdy Rýslan Jeldibaı.
Onyń habarlaýynsha, elimizde jalpy quny 1478,1 mıllıard teńgeni quraıtyn 185 joba paıdalanýǵa berildi. 22,8 myńnan astam turaqty jumys orny ashyldy.
Jobalardyń barlyǵy tolyq qýatyna kóshken kezde ekonomıkaǵa aıtarlyqtaı serpin beredi. Óndiris kólemi 2,3 trıllıon teńgege jýyqtaıdy.
2025 jyly Prezıdent Dostyq – Moıynty temir jolynyń ekinshi jelisin, Qostanaı oblysyndaǵy KIA Qazaqstan avtokólik zaýytyn iske qosty.
Sonymen qatar Memleket basshysy Shymkent jáne Qyzylorda áýejaıynyń jańa termınaldaryn aralap kórip, Astanadaǵy Stadler Kazakhstan zaýyty shyǵarǵan alǵashqy jolaýshylar vagonymen tanysty.
- Budan bólek, qara jáne tústi metallýrgııa, hımııa, tsellıýloza-qaǵaz, jeńil jáne taǵam ónerkásibinde, qurylys ındýstrııasynda birqatar joba iske qosyldy,-dedi QR Prezıdentiniń Baspaóz hatshysy.
Osyǵan deıin 2025 jyl eleýli saıası jáne áleýmettik-ekonomıkalyq jańǵyrýlarǵa toly bolǵany týraly jazdyq.