Ekonomıkalyq ósim – 5,3%, ınflıatsııa – 6%: Májilis úsh jyldyq bıýdjetti qabyldady
ASTANA. KAZINFORM — Májilistiń jalpy otyrysynda 2026-2028 jyldarǵa arnalǵan respýblıkalyq bıýdjet jobasyn qabyldandy.
Qarjy mınıstri Mádı Takıevtiń aıtýynsha, 1 qańtarda kúshine enetin jańa Salyq kodeksi 2026 jylǵy bıýdjet kirisin 3,6 trln teńgege ulǵaıtady.
Bıýdjet tapshylyǵy 0,9%-ǵa deıin tómendeıdi
— 2026 jylǵa túsimder 23,1 trln teńge deńgeıinde boljanyp otyr. Onyń ishinde, transfertterdi eseptemegende, kiris 19,2 trln teńge.
Ekonomıkanyń ósimine, jańa Salyq kodeksiniń qabyldaýyna, onyń ishinde salyqtyq jáne kedendik ákimshilendirýge baılanysty kiris bıylmen salystyrǵanda 3,6 trln teńgege ulǵaıyp otyr. Bul, memlekettik qarjynyń turaqtylyǵyna ákeledi.
Bıýdjet shyǵysy 27,8 trln teńge, ıaǵnı osy jylmen salystyrǵanda 2 trln teńgege ulǵaıyp otyr.
2026 jyly bıýdjet tapshylyǵy jalpy ishki ónimge shaqqanda 2,5% deńgeıinde, al 2028 jylǵa qaraı ol 0,9%-ǵa deıin tómendeıdi dep boljanyp otyr. Bul bıýdjettik tártipti nyǵaıtýǵa jáne boryshtyq júktemeni azaıtýǵa alyp keledi, — dedi mınıstr.
Al áleýmettik shyǵysqa 2026 jyly 10,7 trln teńge bólý josparlanyp otyr. Onyń ishinde áleýmettik tólemderge 6,8 trln teńge, adamı kapıtalǵa 3,9 trln teńge qarastyrylǵan.
Eń tómengi aılyq 110 myń teńge bolsa…
Buǵan deıin kelesi jyly eń tómengi eńbekaqy 85 myń teńge bolatynyn jazǵan edik. Májilistiń Qarjy jáne bıýdjet komıteti úsh jyldyq bıýdjet jobasyna bergen qorytyndysynda osy kórsetkishti kóterýdi suraǵan. Naqtyraq aıtsaq, eń tómengi jalaqynyń mólsherin qazirgi 85 myń teńgeden 110 myń teńgege deıin kóterý usynylǵan.
Úsh jyldyq bıýdjet jobasynda 2026 jylǵy 1 qańtardan bastap negizgi qarjylyq eseptik kórsetkishter mynandaı shamada bolmaq:
1) jalaqynyń eń tómen mólsheri — 85 myń teńge;
2) memlekettik bazalyq zeınetaqy tóleminiń eń tómen mólsheri — 35 596 teńge;
3) zeınetaqynyń eń tómen mólsheri — 69 049 teńge;
4) aılyq eseptik kórsetkish — 4 325 teńge;
5) bazalyq áleýmettik tólemderdiń mólsherlerin esepteýge qajetti eń tómen kúnkóris deńgeıiniń shamasy — 50 851 teńge.
Kúsh qurylymdaryna 3 jylda 3 trln teńge
2026 jyly qorǵanys salasyna jalpy ishki ónimniń 1%-y bólinedi.
— Aldaǵy úsh jylda óńirlerdi damytýǵa 581 mlrd teńge qarastyrylǵan. Onyń ishinde 2026 jylǵa 300 mlrd teńge josparlanǵan. Bul aqshanyń bári mańyzdy jáne jalpy halyqtyq sıpattaǵy mańyzy bar jobalarǵa baǵyttalady.
Sonymen qatar, ákimdikterdiń derbestigin arttyrý úshin 2026 jyly óńirlerge transfertter arqyly 5,1 trln teńge baǵyttalady, — dedi Qarjy mınıstri Mádı Takıev.
Ekonomıkalyq ósim — 5,3%, ınflıatsııa — 6%
Al Premer-mınıstrdiń orynbasary — Ulttyq ekonomıka mınıstri Serik Jumanǵarınniń aıtýynsha, 2026 jyly jalpy ishki ónimniń naqty ósýi 5,4 paıyz bolsa, 3 jyldaǵy ortasha jyldyq ósim 5,3 paıyz dep boljanyp otyr.
— Nomınaldy jalpy ishki ónim 2026 jylǵy 183,8 trln teńgeden 2028 jyly 229,8 trln teńgege deıin ósedi. Ekonomıkanyń ósýi naqty sektor men qyzmet kórsetý salasyndaǵy ósýdiń esebinen qamtamasyz etiletin bolady. Óńdeý ónerkásibinde ınvestıtsııalyq jobalardyń iske asyrylýy esebinen ósý qarqyny 2026 jylǵy 6,2 paıyzdan 2028 jyly 6,6 paıyzǵa deıin ulǵaıady dep boljanady. Taý-ken óndirý ónerkásibindegi úsh jyldaǵy ortasha ósý 2,8 paıyz, aýyl sharýashylyǵynda — 3,9 paıyz, qurylysta — 11,0 paıyz, kólik qyzmetterinde — 10,1 paıyz jáne saýdada — 6,7 paıyz bolady, — dedi Serik Jumanǵarın.
Al ınflıatsııa boljamy 2026 jyly 9-11 paıyz, 2027-2028 jyldary ortasha 6 paıyz deńgeıinde aıqyndalǵan.
Ulttyq qordan jyl saıyn 2 trln 770 mlrd teńge alyp otyrý kózdelgen.
Bıýdjettiń shyǵys bóligi 2026 jyly 27,7 trln teńge nemese jalpy ishki ónimniń 15,1 paıyzy kóleminde, 2027 jyly— 28,8 trln teńge nemese JІÓ-niń 14 paıyzy kóleminde, 2028 jyly— 29,8 trln teńge nemese JІÓ-niń 13 paıyzy kóleminde belgilengen.
Qujat jobasynda donor óńirler aldaǵy úsh jylda respýblıkalyq bıýdjetke 3,3 trln teńge bóledi dep kórsetilgen.
Vıtse-premer Serik Jumanǵarın úsh jyldan keıin Almaty, Shyǵys Qazaqstan, Aqtóbe oblystary da donor óńirge aınalýy múmkin ekenin aıtady.
Úkimet usynǵan úsh jyldyq bıýdjet jobasyn Májilistiń jalpy otyrysyna qatysqan 96 depýtattyń 94 jaqtap daýys berse, 2 depýtat qalys qaldy.