Ekonomıkaǵa jeke ınvestorlar kóbirek qarjy sala bastady
ASTANA. KAZINFORM — Jyl basynan 60,4 mlrd dollardyń taýary eksportqa shyǵaryldy. Bul týraly Úkimet otyrysynda Premer-mınıstrdiń orynbasary — Ulttyq ekonomıka mınıstri Serik Jumanǵarın aıtty.
Onyń málimetinshe ınvestıtsııalar ósýdiń draıveri bolyp otyr. Bıyl qańtar-qyrkúıekte negizgi kapıtalǵa ınvestıtsııalar 16,1 trln teńgeni qurap, 7%-ǵa ósti.
— Ereksheligi — ınvestıtsııalar ósýiniń negizgi faktory jeke ınvestıtsııalar, olar 18,2%-ǵa ulǵaıdy. Investıtsııalardyń neǵurlym eleýli ósýi kelesi salalarda baıqaldy: óńdeý ónerkásibinde — 40,1%, qurylysta — 32, aqparat jáne baılanysta — 29,2, densaýlyq saqtaýda — 20,4, aýyl sharýashylyǵynda — 9,1%. Negizgi kapıtalǵa salynǵan ınvestıtsııalardyń qurylymy ózgerdi. Jeke ınvestıtsııalardyń úlesi 85,7%-dy qurady. Osy jyldyń birinshi jartyjyldyǵynda tikeleı sheteldik ınvestıtsııalardyń jalpy aǵyny 9,4 mlrd dollar boldy. Birinshi jartyjyldyqtyń qorytyndysy boıynsha eksporttyń ozyq ósýi aıasynda saýda balansynyń ulǵaıýy esebinen tólem balansynyń aǵymdaǵy shoty 2,4 mlrd dollar kóleminde profıtsıtpen qalyptasty, — dedi ol.
Vıtse-premerdiń atap ótýinshe, saýda balansynyń profıtsıti ótken jyldyń sáıkes kezeńimen salystyrǵanda eki eseden astam ósip, 16,2 mlrd dollarǵa jetti. 8 aıdyń qorytyndysy boıynsha saýda balansy 17,8 mlrd dollarǵa deıin jaqsardy.
— Taýarlar eksporty 60,4 mlrd dollardy qurady. Taýarlar ımporty — 42,6 mlrd dollar. Joǵary ekonomıkalyq belsendilik aıasynda aralyq taýarlardyń ımporty 13,8%-ǵa jáne ınvestıtsııalyq taýarlardyń ımporty 7,9%-ǵa óskenin erekshe atap ótkim keledi. Sonymen qatar azyq-túlikke jatpaıtyn tutyný taýarlarynyń ımporty 11,2%-ǵa qysqardy. Saýda balansynyń oń dınamıkasy tólem balansynyń aǵymdaǵy shotynyń jaı-kúıin jaqsartýǵa jáne bıýdjet tapshylyǵyn azaıtýǵa alǵysharttar jasaıdy, — dedi Serik Jumanǵarın.
Aıta keteıik, bıyl 9 aıdyń qorytyndysynda el ekonomıkasynyń ósýi 4,2 paıyzdy qurady.
