Ekonomıkadaǵy óndiris sektory ishki suranysty qamtamasyz ete almaı otyr - Súleımenov

ASTANA. KAZINFORM – Ekonomıkalyq belsendilik artyp keledi. Bul týraly Ulttyq bank tóraǵasy Tımýr Súleımenov aıtty.

- Ekonomıkalyq belsendilik artyp keledi. Aldyn ala málimetter boıynsha qańtar-sáýir aılarynda jalpy ishki ónim qarqyny 6 paıyzǵa bardy. Oǵan sebep – munaı óndirisiniń qalypqa kelýi jáne shıkizattyq emes salalardaǵy qarqynnyń artýy. Eń joǵary ósim 22,4 paıyzben kólik jáne qoımalaý salasynda, onyń ishinde qubyrjelisi kóliginde jáne qurylys salasynda da baıqaldy –16,2 paıyz. Munyń bári ınfraqurylymdyq jobalardyń iske asyrylýymen tyǵyz baılanysty, - dedi ol.

UB tóraǵasynyń aıtýynsha, baǵa ósimi tirkelgen salalarda eńbek ónimdiligi artqany da baıqalady. 2025 jylǵy birinshi toqsanda ónim berý kólik, qurylys, aýyl sharýashylyǵy men óńdeý ónerkásibi salalarynda naqty jalaqynyń dınamıkasynan asyp tústi. Bul jaqsy faktor, óıtkeni shyǵyndarǵa tosqaýyl bolyp, birqatar sektorda dezınflıatsııalyq áser qalyptastyrdy. 

- Soǵan qaramastan ekonomıkadaǵy óndiris sektory ishki suranysty qamtamasyz ete almaı otyr. Suranys pen usynys arasyndaǵy aıyrmashylyq saqtalyp, ınflıatsııalyq qysymdy kúsheıte tústi, - dedi Tımýr Súleımenov.

Buǵan deıin Tımýr Súleımenov krıptovalıýtaǵa ınvestıtsııa salýǵa qatysty pikir bildirgen edi.