Ekonomıka jáne bıýdjettik josparlaý mınıstri: 2013 jyldyń úsh aıynda ınflıatsııa 1,9 paıyzdy qurady

Bul týraly búgin Úkimettiń 2013 jyldyń birinshi toqsanyndaǵy áleýmettik-ekonomıkalyq damý qorytyndylaryna arnalǵan Úkimet otyrysynda Ekonomıka jáne bıýdjettik josparlaý mınıstri Erbolat Dosaev aıtty.

«Inflıatsııa aǵymdaǵy jyldyń naýryzynda 0,2 paıyzdy qurady. Al, 2012 jyldyń naýryzynda 0,3 paıyz bolǵan. Jyl basynan beri ınflıatsııa 1,9 paıyzdy qurap otyr. Bul 2012 jyldyń sáıkes deńgeıimen 0,8 paıyzdyq tarmaqqa asyp túsedi. Negizinen bul aqyly qyzmetterge baǵalar men tarıfterdiń 4 paıyzǵa ósýiniń esebinen boldy»,-dedi mınıstr.

Bul rette, E. Dosaevtyń atap ótýinshe, azyq-túlik taýarlar baǵasy ósýiniń tómendeýi baıqalǵan. Máselen, ótken jyly baǵa 1,6 paıyzǵa ósse, aǵymdaǵy jyldyń birinshi toqsanynda 1,1 paıyzǵa artqan. Al, azyq-túlik emes taýarlar 0,6 paıyzǵa tómendegen.

«Sonymen qatar 2013 jylǵy naýryzda 2012 jylǵy jeltoqsanǵa qaraǵanda óńirlik bólinistegi ortasha respýblıkalyq ınflıatsııanyń joǵary deńgeıi Batys Qazaqstan, Aqtóbe, Jambyl, Pavlodar, Qostanaı oblystarynda jáne Almaty qalasynda qalyptasty. Osylaısha, naýryzda ótken jyldyń jeltoqsanymen salystyrǵanda baǵalar Almaty qalasynda sýyq sýǵa - 92,3 paıyzǵa, káriz júıesine - 2,3 esege, elektr energııasyna 5,9 paıyzǵa ósti»,-dedi ol.