«Ekonomıka úshin qarjylyq turaqtylyq mańyzdy» - respýblıkalyq basylymdarǵa sholý
ASTANA. Jeltoqsannyń 26-sy. /QazAqparat/ - Qazaq aqparat agenttigi respýblıkalyq basylymdarda jeltoqsannyń 26-sy, senbi kúni shyqqan ózekti materıaldarǵa sholýdy usynady.
Keshe Almaty men Astana qalalarynda jáne elimizdiń barlyq oblystarynda bir mezgilde QR Prezıdentiniń atynan Jańa jyl shyrshasy merekesi ótti. Osyǵan oraı «Aıqyn» basylymynyń senbilik nómirinde jaryq kórgen «Sender - azat, jasampaz eldiń baqytty urpaǵysyńdar!» atty maqalada Memleket basshysy N.Nazarbaevtyń beınebaılanys arqyly atalǵan sharaǵa qatysýshy balalardy jáne barsha qazaqstandyq búldirshinderdi qystyń eń dýmandy merekesimen quttyqtaǵandyǵy jazylǵan. Basylymnyń jazýynsha, Prezıdent shyrshasyna qatysqan ár balaǵa syılyqqa noýtbýk, mektepke qajetti quraldar salynǵan arqa sómkesi, sondaı-aq táttiler salynǵan qaltalar berilgen. Ár balaǵa qala bıýdjetinen 85 myń teńgeden bólingen.
Jańa jyldyq dýmandy kesh jaıynda «Astana aqshamy» gazetiniń senbilik sanynda da kólemdi maqala jarııalanǵan. Onda «Memleket senderdiń tereń bilim alyp, alańsyz ósýleriń úshin barlyq múmkindikterdi qarastyryp, jaǵdaı jasaýda. Asyl armandaryńdy shyndyqqa aınaldyrý úshin daryndy balalarǵa arnalǵan mektepter ashylyp, elimizdiń barlyq óńirlerinde dýmandy ortalyqtar salyndy», degen Elbasynyń sózi keltirilgen.
Respýblıka boıynsha ótken Prezıdenttik shyrsha «Lıter» basylymynyń nazarynan da tys qalmaǵan.
«Álem qazaqtyń dástúrli mýzykasyna tánti bolatyny sonsha, bizben basqalar básekege túse almaıdy». «Aıqyn» gazetiniń dástúrli «Aq sóıle!» aıdarynda jaryq kórgen Qurmanǵazy atyndaǵy Qazaq ulttyq konservatorııasynyń rektory Jánııa Áýbákirovamen aradaǵy suhbat osyndaı taqyryppen berilgen.
Qarashanyń 13-inde Memleket basshysy N.Nazarbaev tikeleı jeli arqyly qazaqstandyqtardyń saýaldaryna jaýap bergen bolatyn. Al jaýaby berilmegen kóptegen suraqtar tıisti mekemelerge jiberilip, olardyń basshylary BAQ arqyly jaýap berýde. «Aıqyn» basylymynyń senbilik sanynda tikeleı jeliniń qarjy naryǵy qyzmetine qatysty suraqtaryna Ulttyq bank tóraǵasynyń orynbasary Danııar Aqyshev jaýap bergen. «Ekonomıka úshin qarjylyq turaqtylyq mańyzdy» degen taqyryppen berilgen jaýaptardyń tolyq nusqasyn basylymnyń 7-shi betinen oqı alasyzdar.
***
«Astana aqshamy» gazetiniń senbilik nómirinde Elbasynyń qatysýymen elordada jańa perzenthananyń ashylý rásimi ótkendigi jazylǵan. Basylymnyń jazýynsha, qalada 2004 jyly dúnıege kelgen balanyń sany 4 myń bolsa, tórt jyldyń ishinde bul kórsetkish, eselene ósip, 2008 jyly 14 myńǵa jetken.
Sonymen qatar osy basylymda Memleket basshysynyń jańadan ashylǵan «Azııa park» saýda oıyn-saýyq ortalyǵyn aralap, onyń tynys-tirshiligimen tanysqandyǵy jazylǵan.
«Kazahstanskaıa pravda» basylymynyń QR Parlamenti Senatynyń baspasóz qyzmetine silteme jasap habarlaýynsha, keshe Senat Tóraǵasy Qasym-Jomart Toqaev Grýzııanyń Qazaqstandaǵy Tótenshe jáne Ókiletti Elshisi Paata Kalandadzeni qabyldaǵan. Grýzın dıplomatyn osy laýazymǵa taǵaıyndalýymen quttyqtaǵan Q.Toqaev Qazaqstan men Grýzııa qatynastary áriptestik, ózara tıimdi yntymaqtastyq qaǵıdalaryna oraı damyp kele jatqanyn jáne budan bylaı únqatysýdy ilgeriletýge múddeli ekenin atap ótken. Kezdesý barysynda taraptar halyqaralyq uıymdardyń, atap aıtqanda birneshe kúnnen keıin Qazaqstannyń tóraǵalyq etýine kóshetin EQYU aıasyndaǵy ózara is-qımyl máselelerine erekshe kóńil aýdarǵan.
«Qazaqstannyń Qorǵanys mınıstri Ádilbek Jaqsybekov jumys saparymen Qytaı Halyq Respýblıkasynda boldy», dep jazady «Ekspress-K» basylymy. Qazaqstannyń qorǵanys vedomstvosynyń basshysy sapar barysynda Qytaı Halyq Respýblıkasynyń Ulttyq qorǵanys mınıstri general-polkovnık Lıan Gýanlemen jáne Ortalyq áskerı keńes tóraǵasynyń orynbasary general-polkovnık Go Bosıýnmen kezdesken.
