Ekonomıka salasyndaǵy qylmystar bireýge zııanyn tıgizbese ǵana izgilendirý jóninde áńgime qozǵaýǵa bolady - A.Perýashev
ASTANA. 10 aqpan. QazAqparat /Aıdar Ospanalıev/ - «Atameken» Odaǵy» ulttyq ekonomıkalyq palatasynyń tóraǵasy Azat Perýashevtiń pikirinshe, ekonomıka salasyndaǵy qylmystar bireýge zııanyn tıgizbese nemese odan kelgen shyǵyn qaıta qalpyna keltirilse ǵana ony izgilendirýge bolady.
Bul týraly ol búgin Bnews.kz portaly arqyly ótken onlaın konferentsııa barysynda málim etti.
A.Perýashevtiń pikirinshe, M.Ábilıazov sııaqty azamattar memleketimizden 10-12 mıllıard dollarǵa deıingi aralyqta qarjy alyp shyqqan. «Bul - óte mol kólemdegi qarjy. Biz bul másele boıynsha Ulybrıtanııa, Shveıtsarııa, Reseı sııaqty elderdiń quzyrly organdaryna Úndeý joldap, urlanǵan qarjyny elge qaıtarýdy suradyq. Bul bizdiń qarjymyz, bul bizdiń bolashaq urpaqtarymyzdyń enshisindegi úles. Bul qarjy Qazaqstannyń ıgiligi úshin jumys isteýi kerek. M.Ábilıazovtyń ózi eshkimge de keregi joq. Ony barǵan elinde qaldyrýǵa bolady. Al memleket qarjysy elge qaıtarylýy kerek. Sondyqtan mundaı áreketterge kelgende izgilendirý týraly áńgime qozǵaý múmkin emes», - dedi A.Perýashev.
