Ekonomıka ósimi - 4%: Úkimet mindeti - Elbasynyń strategııalyq baǵdaryn oryndaý
NUR-SULTAN. QazAqparat - Premer-Mınıstr Asqar Mamınniń tóraǵalyǵymen ótken 2019 jylǵy qańtar–mamyr aralyǵyndaǵy elimizdiń áleýmettik-ekonomıkalyq damýynyń jáne respýblıkalyq bıýdjettiń oryndalýynyń qorytyndylary týraly QR Úkimetiniń otyrysynda ulttyq ekonomıka, qarjy, ındýstrııa jáne ınfraqurylymdyq damý, energetıka, aýyl sharýashylyǵy mınıstrleri baıandady. QR Ulttyq banki men birqatar óńirlerdiń ákimderiniń baıandamalary tyńdaldy, dep habarlaıdy primeminister.kz.
«Bıylǵy qańtar-mamyr aılarynda jalpy ishki ónimniń ósimi ótken jylǵa qaraǵanda 4% qurady», - dep QR Úkimetiniń basshysy, ekonomıkalyq damý qarqynyn arttyrý boıynsha sharalar qabyldaýdy tapsyrdy.
Ekonomıkanyń negizgi qozǵaýshy kúshteri qurylystyń 8,8%-ǵa, saýdanyń 7,5%-ǵa, kólik salasynyń 5,3%-ǵa, óńdeýshi sektor, onyń ishinde mashına jasaýdyń 16%-ǵa, avtoónerkásiptiń 46,4%-ǵa ósýi boldy.
Osy jyldyń 5 aıynyń qorytyndysy boıynsha áleýmettik-ekonomıkalyq damý boıynsha Aqmola, Pavlodar, Shyǵys Qazaqstan, Qostanaı, Túrkistan oblystarynyń oń jumysy baıqaldy.
QR Premer-Mınıstri A. Mamın óńirler ákimderine qurylys, ınvestıtsııalar, ónerkásip jáne turǵyn úıdi paıdalanýǵa berý salalarynda kórsetkishterdiń ósýin qamtamasyz etý boıynsha sharalardy kúsheıtýdi tapsyrdy.
Bıylǵy mamyrda aılyq ınflıatsııa 0,6% qurady. Osylaısha, jyl basynan beri ınflıatsııa 2,4% qurady. QR Úkimetiniń basshysy belgilengen dálizge (4-6%) sáıkestigine qaramastan, birqatar óńirlerde aýyl sharýashylyǵy taýarlaryna baǵanyń ósýi baıqalǵanyn aıtty.
«Qazir jemis-jıdek pen kókónisterdiń kóp ýaqyty, sondyqtan baǵalar arzandaýy kerek, - dedi Askar Mamın. - Ákimder, ásirese, áleýmettik mańyzy bar azyq-túlik taýarlarynyń baǵasyn turaqty ustaý boıynsha naqty sharalar qabyldasyn».
Respýblıkalyq bıýdjettiń oryndalýy boıynsha konkýrstyq rásimderdi ýaqytyly ótkizý boıynsha kúsheıtilgen jumystardy jalǵastyrý qajettigi atap ótildi. Bul bıýdjet qarajatyn ıgerý boıynsha táýekelderdi joıýǵa múmkindik beredi.
Máseleni qorytyndylaǵan QR Premer-Mınıstri Asqar Mamın Qazaqstan Respýblıkasynyń Tunǵysh Prezıdenti - Elbasy Nursultan Nazarbaevtyń strategııalyq baǵdaryn jáne saılanǵan Memleket basshysy Qasym-Jomart Toqaevtyń saılaýaldy baǵdarlamasynyń tolyǵymen júzege asyrylýyn qamtamasyz etýdiń mańyzdylyǵyn atap ótti. Bul ekonomıkanyń jáne ınfraqurylymnyń turaqty damýy, qoljetimdi baspanamen qamtamasyz etý, sonymen qatar bilim berý, densaýlyq saqtaý máselesin jaqsartý arqyly halyqtyń tabysyn jáne turmys sapasyn arttyrý. Memleket basshysynyń saılaýaldy tuǵyrnamasynyń strategııalyq mindetterin tıimdi júzege asyrýdyń arqasynda áleýmettik máselelerdi sheshýge múmkindik jasalady.
«Jańa jumys oryndaryn ashý - Úkimet jumysynyń basymdyqty mindeti, - dep A. Mamın, nátıjeli jumyspen qamtý máseleleri ekonomıkanyń damýyna, turǵyndardyń tabysyn arttyrýǵa, básekeli óndiristerdiń ashylýyna tikeleı baılanysty ekenin atap ótti. - Barlyq ákimder jáne memlekettik organdardyń basshylary ınvestıtsııalar tartýǵa, shaǵyn jáne orta bıznestiń damýyna barynsha kóńil bólýi kerek. Bul jumysty úzdiksiz júrgizý qajet».
