Ekonomıka mınstrligi: 112 aýylda qosymsha mektepter men aýrýhanalar salynady

NUR-SULTAN. QazAqparat - Búgin Premer-mınıstr Álıhan Smaıylovtyń tóraǵalyǵymen ótkizilgen keńeste Ulttyq ekonomıka mınıstri Álibek Qýantyrov «Aýyl – El besigi» baǵdarlamasyn iske asyrý barysy týraly baıandady.

UEM basshysy Álibek Qýantyrovtyń aıtýynsha, Memleket basshysynyń tapsyrmasyna sáıkes «Aýyl – El besigi» baǵdarlamasy sheńberinde mektep, aýrýhana, mádenıet úıi men sport nysany sekildi áleýmettik nysandardy salý, qaıta jańartý jáne jóndeý úshin batys jáne ońtústik oblystarǵa qosymsha 20 mlrd teńge bólý josparlanǵan.

Ulttyq ekonomıka mınıstrligi batys jáne ońtústik oblys (Aqtóbe, Almaty, Atyraý, Batys Qazaqstan, Jambyl, Qyzylorda, Mańǵystaý, Túrkistan) ákimdikteriniń usynysymen 130 joba boıynsha 20 mlrd teńgege tizbe qalyptastyrdy. Onyń 9,6 mlrd teńgesi batys, 10,4 mlrd teńgesi ońtústik óńirge.

«2022 jyly batys óńirde 8 medıtsınalyq, 15 – bilim berý, 14 - sport, 15 – mádenıet nysany salynyp, jańǵyrtylady. Ońtústikte 26 medıtsınalyq, 23 – bilim berý, 14 - sport, 15 – mádenıet nysany salynady», - dedi mınıstr.

Sóziniń sońynda Álibek Qýantyrov atalǵan is-sharalardy iske asyrý respýblıkanyń batys jáne ońtústik óńirlerindegi 112 aýyldyq eldimekende turatyn 500 myńnan astam aýyl turǵynyna medıtsınalyq, bilim berý, sporttyq jáne basqa da qyzmetterdi usyný sapasyn qamtamasyz etýge múmkindik beretinin atap ótti.