Ekonomıka mınıstrligi Ulttyq qorsyz bıýdjetti qarjylandyrý múmkin emes ekenin moıyndady
ASTANA. KAZINFORM – Ulttyq ekonomıka birinshi vıtse-mınıstri Tımýr Jaqsylyqov elimizdegi tabıǵı resýrstardy bólýdiń ádildigi týraly túsinik berdi.
«Kez kelgen ekonomıkada qoǵamdyq ál-aýqatty qaıta bólý mehanızmi shamamen uqsas keledi, ol salyq júıesi arqyly júzege asady. Memleket salyq arqyly tabystyń bir bóligin keıbir salalardan kóbirek, keıbir salalardan azdaý alyp, basqa salalarǵa bóledi. Bul mehanızm elimizde óte jaqsy jumys istep tur. Sonymen qatar Qazaqstan ekonomıkasynyń basqa elderden aıyrmashylyǵyna toqtalsaq, bizde taý-ken ónerkásibinen jáne munaıdan túsetin kirister jınalatyn Ulttyq qorymyz bar», - dedi T. Jaqsylyqov Senatta tilshiler suraǵyna jaýap bere otyryp.
Bul turǵyda ol «Ulttyq qor – balalarǵa» baǵdarlamasyna toqtaldy.
«Bıyldan bastap biz ken oryndaryn paıdalanýdan memleket alatyn tabysqa halyqtyń, ıaǵnı balalardyń qatysý tetigin engizdik. Balalarǵa arnalǵan ulttyq baǵdarlama ol óz jumysyn bastady, qazir tek alǵashqy qadam júzege asyrylyp jatyr. Sonymen qatar biz Ulttyq qorsyz bıýdjetti qarjylandyra almaımyz. Sondyqtan kiristiń bir bóligin bıýdjetke transfert túrinde alyp otyramyz, sodan keıin bıýdjettik tetikter arqyly ekonomıkaǵa bólemiz. Jalpy, bizde bul tetikterdiń barlyǵy jumys istep tur. Shynynda da Qazaqstannyń tabıǵı jer qoınaýy ekonomıkany qoldaýǵa baǵyttalǵan», - dedi vıtse-mınıstr.
