Ekonomıka mınıstri aqshany ınflıatsııadan saqtandyrýdyń senimdi joldaryn aıtty
«Ekonomıkaǵa jaýapty mınıstr retinde aıtyńyzshy, Qazaqstandyqtar osyndaı qubylmaly kezeńde qoldaǵy aqshasyn ınflıatsııadan qalaı saqtandyrýy kerek?», - dep surady BAQ ókili ortalyq kommýnıkatsııalar qyzmetinde ótken brıfıngte.
«Artyq aqsha kóp bolsa, árıne, brokerler arqyly sheteldegi jyljymaıtyn múlikke ınvestıtsııalaýǵa bolatyn edi. Biraq, qazaqstandyqtar úshin eń qarapaıym tásil aqshany teńgedegi depozıtterde saqtaý shyǵar. Óıtkeni bul - eń qarapaıym jol. Onyń merzimdik jáne merzimdik emes depozıtteri bar. Óziń ol aqshany dál qazir paıdalanbaıtyn bolsań, osylaı aınaldyrýǵa bolady. Nege teńgemen saqtaý kerek degenge kelsek, óıtkeni mólsherlemesi dollarǵa qaraǵanda áldeqaıda joǵary. Dollardyń qymbattaıtynyna senip otyryp ta aqshany joǵaltýǵa bolady. Bizde dollardaǵy depozıtterge 1 paıyz kóleminde ǵana jyldyq mólsherleme belgilengen. Sondyqtan teńgedegi depozıtte saqtaýdy eń bir qarapaıym jol retinde aıtyp otyrmyn», - dedi mınıstr.
Sondaı-aq, ol brokerler qyzmetine júgingender bolsa, aqshany ártaraptandyryp ınvestıtsııalaý mańyzdy ekenin eskertti.
«Bizde qarjylyq quraldar barshylyq. Artyq aqshasy bar adam qarjy naryǵynan habary az, qarapaıym jan bolsa, senimdi brokerler arqyly aktıvterin ártaraptandyryp saqtaý kerek dep oılaımyn», - dedi ÁlibekQýantyrov.
Aıta keteıik, Ulttyq ekonomıka mınıstri Qazaqstan aýmaǵynan zańsyz shyǵarylǵan kapıtal 100 mlrd dollardan asýy múmkin ekenin aıtty.
