Ekonomıka men memlekettik basqarýdaǵy qurylymdyq reformalardyń jańa toptamasy ázirlenedi

NUR-SULTAN. QazAqparat – Ekonomıka men memlekettik basqarýdaǵy qurylymdyq reformalardyń jańa toptamasy ázirlenedi. Bul týraly búgin Úkimet otyrysynda QR Ulttyq ekonomıka mınıstri Álibek Qýantyrov aıtty, dep habarlaıdy QazAqparat tilshisi.

Onyń aıtýynsha, Memleket basshysynyń Joldaýyn iske asyrý jónindegi jalpyulttyq is-sharalar josparynyń «Daǵdarysqa qarsy birinshi kezektegi sharalar týraly» baǵytynda 5 is-shara iske asyrylatyn bolady.

«Áleýmettik-ekonomıkalyq jaǵdaı úshin týyndaıtyn táýekelderdi nıvelırleý maqsatynda daǵdarysqa qarsy sharalar josparynyń jobasy ázirlendi. Ol:

- qarjy júıesiniń turaqtylyǵyn qamtamasyz etýge,

- ınflıatsııany baqylaý jáne tómendetýge,

- kólik-logıstıkalyq tizbektegi alshaqtyqty qysqartýǵa,

- syrtqy saýda qyzmetin qoldaý jáne yntalandyrýǵa,

- ekonomıka salalaryn qoldaý jáne ınvestıtsııalar tartýǵa baǵyttalǵan», - dedi Álibek Qýantyrov.

Mınıstrdiń atap ótýinshe,, egis naýqanyn sapaly júrgizý qamtamasyz etiledi. Onyń ishinde fermerlerge janar-jaǵarmaı materıaldarynyń qajetti jeńildikti kólemi bólinedi, aýyl sharýashylyǵy tehnıkasynyń, tuqym jáne tyńaıtqysh qorlarynyń daıyndyǵy tekseriledi.

«Budan basqa, saıası jańǵyrý strategııasyn eskere otyryp, ekonomıka men memlekettik basqarýdaǵy qurylymdyq reformalardyń jańa toptamasyn daıyndaý josparlanýda», - dedi ol.