Ekonomıka ǵylymdarynyń doktory, professor Jasqaırat Súndetuly - 70 jasta
ASTANA. 27 maýsym. QazAqparat - Astana tórinde ekonomıka ǵylymdarynyń doktory, professor Jasqaırat Súndetulynyń 70 jasqa tolǵan mereıtoıy atalyp ótti.
Ol - ekonomıka ǵylymdarynyń doktory, professor, Qazaqstan Respýblıkasy Aýyl sharýashylyǵy ǵylymdary akademııasynyń akademıgi, QR Bilim jáne ǵylym mınıstrliginiń «Joǵarǵy oqý oryndarynyń úzdik oqytýshysy-2009» grantynyń ıegeri, Batys Qazaqstan oblysy, Jańaqala aýdanynyń qurmetti azamaty.
Jasqaırat Súndetulynyń ǵylymı jeteksheligimen ekonomıka salasynda 1 ǵylym doktory, 5 kandıdat men 12 magıstr dıssertatsııalar qorǵady. Ol 2002-2007 jyldary Parlament Májilisiniń ǵylymı-saraptama keńesiniń jáne jumys tobynyń múshesi retinde ońdaǵan zańdardyń jobalaryn daıyndaýǵa qatysty.
QR Aýyl sharýashylyǵy ǵylym akademııasynyń prezıdenti, «Aýyl» Qazaqstan sotsıal-demokratııalyq partııasynyń tóraǵasy Ǵanı Qalıev ómir jolynda jeti belesti baǵyndyrǵan J.Súndetulynyń ǵylym jolyndaǵy jetistikterin joǵary baǵalady. Onyń adamgershilik, azamattyq qasıetteri týraly syr bólisti. Aýyl sharýashylyǵy ǵylymynyń damýyna úles qosyp kele jatqan mereıtoı ıesiniń ıyǵyna shapan japty.
Batys Qazaqstan oblysynyń burynǵy ákimi, qazirgi Májilis depýtaty, qoǵam qaıratkeri Qabıbolla Jaqypov, QR Parlamenti Májilisiniń úshinshi shaqyrylymynyń depýtaty, qoǵam qaıratkeri Ravıl Shyrdabaev ǵalymnyń aımaqtardy damytýǵa qosqan úlesi týraly pikir bildirdi.
Aýyl sharýashylyǵy ǵylymdarynyń doktory, akademık Kópmaǵambet Elemesov, ekonomıka ǵylymdarynyń doktory, akademık, Qazaq ekonomıka, qarjy jáne halyqaralyq saýda ýnıversıtetiniń rektory Ǵabdyǵapar Seıitqasymovtar alqaly top aldynda mereıtoı ıesiniń elimizge sińirgen eńbegi týraly aıta kelip, óz tilekterin jetkizdi.
Batys Qazaqstan oblysynan kelgen syılas dostaryn mektepte birge oqyǵan joldasy, Jaıyq óńirinde birqatar jaýapty qyzmetter atqarǵan Tasbolat Muqashev bastap keldi.
Jasqaırat Súndetuly zaıyby Balaıym apa ekeýi dúnıege ákelgen qos ul men eki qyz jeke-jeke shańyraq kóterdi. Olar da áke salǵan joldy jalǵastyryp, ǵylym men bilim salasynda eńbek etip júr. Búgingi tańda ulaǵatty nemereler ósip keledi.
