Ekomın zańsyz balyq aýlaıtyndarmen qalaı kúrespek

ASTANA. QazAqparat – Elimizde balyq brakonerligi problemasymen kúres jáne zańsyzdyqtyń aldyný alý maqsatynda jańa júıe ázirlenip, synaqtan ótip jatyr. Tolyǵyraq Ekologııa jáne tabıǵı resýrstar mınıstrligi balyq sharýashylyǵy komıteti tóraǵasynyń orynbasary Aıan Bahııanov aıtyp berdi, dep habarlaıdy QazAqparat tilshisi.

«Búginde balyq sharýashylyǵy komıteti balyq jáne balyq ónimderin qadaǵalaýdyń aqparattyq júıesin ázirlep jatyr. Maqsat – elimizdegi jáne shetelden ákelinetin balyq salasyn júıeleý. Baqylaý júıesi balyq aýlaýdan bastap, satýǵa jiberýge deıingi barlyq protsesti tolyq qadaǵalaıdy. Balyqty el ishinde satý úshin veterınarlyq anyqtama bolý kerek. Al balyq jáne onyń ónimderi elden tys jerlerge ketetin bolsa onda veterınarlyq sertıfıkat bolýy mindetti», -dedi Aıan Bahııanov ortalyq kommýnıkatsııalar qyzmeti alańynda ótken baspasóz máslıhatynda.

Mamannyń málimetinshe, joǵaryda atalǵan qujattardy basseındik balyq sharýashylyǵy ınspektsııalary balyqtyń zańdylyǵyn rastaǵan soń beredi.

«Eger balyqty satylymǵa jiberý barysynyń zańdylyǵyn tekserýde qandaı da kemshilik anyqtalsa, veterınarlyq qyzmet ruqsat qujatyn usyna almaıdy. Ondaı jaǵdaıda balyq avtomatty túrde brakonerlik, ıaǵnı zańsyz jolmen aýlandy dep sanalady. Qazir jańa júıe ázirlenip, synaqtan ótip jatyr. 2024 jyldyń birinshi toqsanynda atalǵan aqparattyq júıeni engizý josparlanyp otyr», - deıdi ol.