Ekologtardy Almaty aýasynyń lastanýy alańdatyp otyr
ALMATY. QazAqparat – Almaty búginde elimizdegi aýasy eń las qalalardyń qatarynda. Ekologtar osylaısha dabyl qaǵýda, dep habarlaıdy QazAqparat tilshisi.
Sondyqtan olar qorshaǵan ortaǵa zalal keltirgen nysandardy anyqtap, shara qoldaný qajet dep esepteıdi.
Osy keleńsiz jaǵdaıǵa arnalǵan jıynda megapolıstegi ekologııalyq jaǵdaı máseleleri talqylanyp, ekologııany jaqsartýdyń tıimdi tetikteri qaraldy. Ekologııa salasyndaǵy sarapshylar men belsendiler aýany lastaý kózderiniń máselelerin kóterdi.
«Zelenoe spasenıe» ekologııalyq qoǵamynyń jetekshisi Sergeı Kýratovtyń aıtýynsha, qaladaǵy ekologııalyq jaǵdaıdy zań júzinde sheshý qajet. Óıtkeni úlken óndiristik kásiporyndar men shaǵyn bıznes ıeleri ekologııalyq–sanıtarlyq talaptardy saqtamaıdy. Sonyń saldarynan eń aldymen adamdar zardap shegedi.
«Bizdiń qoǵamǵa Almatydaǵy «Qaırat» yqshamaýdanynyń turǵyndary shaǵymdandy. Olardyń úıleriniń janynan úlken avtobýs parki ashylypty. Bir qaraǵanda qalypty jaǵdaı sııaqty. Qoǵamdyq kólik qalaǵa qajet. Másele mynada. Qoldanystaǵy zańǵa sáıkes, avtopark aýany lastaıtyn quraldardyń qataryna jatady. Sondyqtan bul turaq úılerden kem degende 300 metr qashyqtyqta ornalasýy tıis. Al bul avtobýs parki men turǵyn úıdiń arasy nebári 10 metr. Tańerteń qoǵamdyq kólikterdi otaldyra bastaǵanda jan- jaǵyn qara tútin basady. Osyǵan oraı biz qaladaǵy barlyq jaýapty jáne quzyrly mekemelerge túsinikteme berýlerin suradyq. Ókinishke oraı, kúni búginge deıin mardymdy jaýap almadyq»,- deıdi Sergeı Kýratov.
Onyń aıtýynsha, Qazaqstannyń ekologııa týraly zańyn oryndaý deńgeıi de kóńil kónshitpeıdi. Bul osylaı jalǵasa beretin bolsa qalamyzdyń ekologııalyq jaǵdaıdyn qalpyna keltirý ońaıǵa soqpaıdy.
Sharaǵa qatysýshylar aýanyń ártúrli kózdermen lastaný deńgeıin azaıtý úshin barlyq baǵyttar boıynsha keshendi jumys júrgizý qajet ekenin aıtty.
