Ekologtar teńizdiń qyzyl túsine qatysty zertteý qorytyndysyn jarııalady

AQTAÝ. KAZINFORM – Mańǵystaý oblystyq ekologııa departamenti mamandary Kaspıı teńiziniń qyzyl túske boıalý qubylysyna baılanysty 2025 jyldyń 12 aqpan kúni teńiz sýynan synama alyp, hımııalyq jáne munaı ónimderine taldaý jumystaryn júrgizgen bolatyn. Synama qorytyndysy boıynsha qaýipti eshteńe anyqtalmaǵan. 

— Taldaý qorytyndysyna sáıkes lastaýshy zattar anyqtalmady. Bári qalypty bolyp shyqty. Baldyrlar sýǵa qoıý qońyr, qyzyl tús beredi. Bizde qar jaýyp, osy joly qubylys aıqynyraq kórindi. Baldyrlar taıaz sýda, atap aıtqanda, bizdiń jaǵalaýda ósedi. Olar bar jerlerde sýdyń túsi ózgerip turady. Árıne, biz bul tabıǵı qubylys týraly bilsek te, sýdyń kúıin tekserýge mindettimiz, - deıdi Mańǵystaý oblystyq ekologııa departamentiniń bólim basshysy Qaısar Nádirbek. 

Buǵan deıin, Aqtaýda Kaspıı teńiziniń jaǵalaýy qyzyl túske boıalyp, turǵyndardy alańdatqany týraly jazǵan bolatynbyz. 

Sondaı-aq Kaspıı teńiziniń jaǵalaýdan alystap bara jatqanyn habarlaǵan edik.