Ekologtar teńiz betindegi maı qaldyqtaryna qatysty tekseris qorytyndysyn jarııalady

AQTAÝ. KAZINFORM – Mańǵystaý oblystyq ekologııa departamentiniń mamandary Aqtaýda teńizge qoqys pen maı tógildi degen aqparatqa qatysty jedel tekserý jumystaryn júrgizdi.  

– Mańǵystaý oblysy boıynsha ekologııa departamenti zerthanalyq-taldamalyq baqylaý bóliminiń mamandary 12 shilde kúni áleýmettik jelide taralǵan Aqtaý qalasy 15 shaǵynaýdanyndaǵy teńiz jaǵasynyń lastanýyna baılanysty aqparattyń anyq-qanyǵyn tekserdi. Sholý jumystary barysynda teńiz jaǵasynan eshqandaı lastanǵan aımaq anyqtalmady, - delingen habarlamada. 

Aıta keteıik, buǵan deıin áleýmettik jelide Aqtaý turǵyndarynyń jaǵalaý aımaǵynyń jaǵdaıyna alańdap, ekologııalyq ahýaldyń nasharlaýyna nazar aýdarýǵa shaqyrǵan vıdeosy jarııalanǵan bolatyn. Onda teńiz betiniń lastanǵany anyq kórinedi. Kýágerlerdiń aıtýynsha, 15-shaǵyn aýdan mańynda teńiz sýynyń betinde maıly daqtar men qalqyp júrgen qoqys baıqalǵan. 

Sonymen qatar táýelsiz ekolog Kaspııdegi munaı kompanııalaryn jappaı tekserýdi usynǵanyn jazǵan edik.