Ekologter kúni: «Eko aýdıt» jańa túsirilimin bastady
ASTANA. KAZINFORM – 5 maýsym Dúnıejúzilik qorshaǵan ortany qorǵaý jáne ekologtar kúnine oraı Jibek Joly telearnasynyń «Búgin.LIVE» baǵdarlamasynda tabıǵatty saqtaý baǵytyndaǵy jumystar men ekologııalyq mádenıetti qalyptastyrý máselesi sóz boldy.
«Eko aýdıt» telejobasynyń júrgizýshisi Gúljazıra Ǵalıqyzy búginde Aqmola oblysynda jobanyń kezekti túsirilimi júrip jatqanyn aıtty.
Onyń sózinshe, túsirilim barysynda Býrabaı, Zerendi jáne Kókshetaý óńirlerindegi orman qoryn saqtaý, órttiń aldyn alý, aǵash kóshetterin ósirý jáne kólderdiń ekojúıesin qorǵaý baǵytyndaǵy jumystar qamtylǵan.
– Orman órtin erte anyqtaıtyn aqparattyq júıeler, baqylaý kameralary alǵash bolyp osy óńirde engizilgen. Sonymen qatar elimizdegi jalǵyz orman tuqymy banki Býrabaıda ornalasqan. Zerendide kólderdiń ekojúıesin saqtaýǵa úles qosyp júrgen mamandarmen, al Kókshetaýda aǵash kóshetterin ósiretin zamanaýı jylyjaı qyzmetkerlerimen kezdesip, olardyń jumysyn kórsettik, – dedi Gúljazıra Ǵalıqyzy.
Eske sala keteıik, bul telejoba Prezıdent tapsyrmasymen júzege asyp jatqan 2 mlrd aǵash otyrǵyzý bastamasynyń óńirlerde qalaı oryndalyp jatqanyn nazarǵa alady.
Sonymen birge baǵdarlamada jas ekologtardyń da bastamalary tanystyryldy. Astanadaǵy Qaıym Muhamedhanov atyndaǵy №90 gımnazııa oqýshylary energııany únemdeý men organıkalyq qaldyqtardy qaıta paıdalaný taqyrybyndaǵy jobalaryn kórsetti.
9-synyp oqýshysy Káýsar Súgirbekova sý energııasyn paıdalaný arqyly elektr qýatyn óndirý qaǵıdatyn túsindiretin maketin tanystyrsa, 5-synyp oqýshylary Aızere Qasqarbekova men Kórkem Qaıshybaı ósimdikterdiń ósýin jedeldetýge arnalǵan tabıǵı tyńaıtqyshtardy ázirleý tájirıbesin bólisti.
Aıta keteıik, buǵan deıin, memleket basshysy ekologııalyq mádenıet pen qoǵamdyq tártip qatar damýy kerektigin aıtqan edi.
