Ekologtar: «Kókjaılaý» shıpajaıy Ulttyq saıabaqtyń ekojúıesine zııan keltirmeıdi
ALMATY. QazAqparat - Almatyda «Kókjaılaý» taý shańǵy shıpajaıynyń ekologııalyq máselesi boıynsha qoǵamdyq tyńdaý ótti.
Qoǵam ókilderiniń nazaryna «Kókjaılaý» jobasynyń jobalyq-smetalyq qujattamalaryn ázirleý aıasynda daıyndalǵan Qorshaǵan ortaǵa áserin baǵalaý jobasy usynyldy. Ekologııalyq zertteýlerdi «Qazekologııa» kompanııasy júrgizdi.
Ekologtardyń paıymdaýynsha, qurylys jumystarynyń qorshaǵan ortaǵa áseri zańnamada kózdelgen normalardan aspaıdy.
«Shtattyq tártipteme kezinde «Kókjaılaý» taý shańǵy shıpajaıynyń ınfraqurylymdaryn salý jáne paıdalaný boıynsha josparlanyp otyrǵan qyzmet tabıǵı ortaǵa jáne shıpajaı syrtyndaǵy turǵyndardyń densaýlyǵyna aıtarlyqtaı teris áserin tıgizbeıdi», - dep atap ótti «Qazekologııa» dırektory Amangeldi Sqaqov.
Baǵalaý jobasyn daıyndaý barysynda ekologtar taý shańǵy shıpajaı aýmaǵyndaǵy qorshaǵan ortanyń negizgi sıpattamalaryn anyqtady. Máselen, qar jamylǵysynyń ortasha qalyńdyǵy 70-80 sm, al eń úlken qalyńdyǵy 147 sm quraıdy, bul taý shańǵysy trassalaryn uıymdastyrýǵa arnalǵan qar jamylǵysynyń normasynan (30 sm) aıtarlyqtaı joǵary.
Sonymen qatar, Kókjaılaý shatqalyndaǵy jasyl jelek mal jaıylymyna paıdalaný saldarynan uzaq ýaqyt ózgeriske ushyraǵan. Shrenk shyrshasynyń qalyńdap ketkeni anyqtaldy. Jobada Shrenk shyrshasynyń jas aǵashtaryn basqa jerlerge aýystyryp qaıta otyrǵyzý qarastyrylǵan.
Paıdalaný kezeńinde tabıǵı topyraq jamylǵysyna tikeleı áser etýge jobada jol berilmeıdi.
«Árıne, qorshaǵan ortaǵa áseri bolady, biraq ol tek qurylys kezinde ǵana jáne az mólsherde», - dep túsindirip ótti «Kókjaılaý» taý shańǵy shıpajaıy» kompanııasynyń atqarýshy dırektory Lýkas Marshand. - Al bizdiń basty mindetterimizdiń biri - bul áserdi barynsha azaıtý, oǵan zamanaýı tehnologııalar men ozyq halyqaralyq tájirıbe tolyq múmkindik beredi. Bizdiń jobamyz qatań túrde QR zańnamalaryna saı júzege asyrylady. Aldaǵy ýaqytta, qurylys bitkennen keıin shıpajaı turaqty damýǵa jáne ekologııany jaqsartýǵa baǵyttalatyn bolady. Mysaly, onda ósimdikterdiń sıpattamalary berilgen baq, toǵan qarastyrylǵan, sondaı-aq jergilikti ósimdik jáne janýarlar áleminiń tabıǵı ártúrligin saqtaý jáne kóbeıtý boıynsha zertteý jumystaryn júrgizý de boljanyp otyr. Shıpajaı óskeleń urpaqty jáne basqa da nıet bildirgenderdi jergilikti jerdiń mádenıetimen, ekologııalyq jáne tarıhı murasymen tanystyra otyryp, tanymdyq qyzmet te atqaratyn bolady».
