Ekologtar Qazaqstanda AES salýǵa qatysty pikir bildirdi
NUR-SULTAN. QazAqparat - Qazaqstanda AES qurylysyn júrgizbes buryn ekologtar balamaly energııa kózderi men olardyń áleýetine nazar aýdarýǵa shaqyrady, dep habarlaıdy QazAqparat tilshisi.
«Jasyl ekonomıka úshin» jáne G-Global damý koalıtsııasy» ZTB basshysy Saltanat Temirqulovanyń aıtýyna qaraǵanda, Qazaqstanda AES qurylysyn júrgizýden buryn eń aldymen jasyl ekonomıka qaǵıdattaryn eskere otyryp, barlyq nysandarǵa aýdıt júrgizý kerek.
«Búgingi tańda elektr qýatynyń 70 paıyzy turǵyn úı sektorlarynda únemsiz paıdalanylyp jatqanyn bilemiz. TÚKSh jańǵyrtý jumystary ne úshin júrgizilip jatyr? Sebebi, jylýmen, elektr qýatymen qamtý júıelerin ózgertý kerek. Jylý joldarynda úlken shyǵyn bar. AES qurylysyn júrgizý máselesi nelikten kóterilip otyr? Sebebi, elektr qýaty jaǵynan tapshylyq bar. Eń aldymen, energııa únemdeýshi sharalar men jelilerdi jańǵyrtý esebinen elektr qýatynyń jetispeýshiligin sheshýge bola ma degen suraqqa qatysty aýdıt júrgizý kerek», - dedi Saltanat Temirqulova elordada ótken baspasóz máslıhatynda.
Ol óz sózinde «jasyl ekonomıkaǵa» ótý boıynsha tujyrymdamaǵa sáıkes, Qazaqstanda elektrmen qamtý balansynyń 50 paıyzy balamaly qýat kózderiniń esebinen bolýy tıis ekenin jetkizdi.
«Jasyl» qoǵamdyq uıym retinde eń aldymen balamaly qýat kózderiniń - kún men jelden, sýdan óndiriletin energııanyń áleýetine nazar aýdarylsa deımiz. Bul áleýette trıllıon kılovatt qýat jatyr. Al keleshek - balamaly qýat kózderinde ekeni baıaǵydan aıtylyp kele jatyr», - deıdi sarapshy.
Eske sala ketsek, QR Prezıdenti Qasym-Jomart Toqaevtyń RF-ke resmı sapary barysynda Reseı Prezıdenti Vladımır Pýtın eki el arasyndaǵy energetıkalyq saladaǵy yntymaqtastyqty keńeıtýdi jáne Qazaqstanda AES qurylysyn reseılik tehnologııamen júrgizýdi usynǵan edi.
«Beıbit atom salasynda yntymaqtastyq damyp keledi, ýran óndirý men baıytý boıynsha qazaqstandyq-reseılik alty kásiporyn jumys isteýde. Ózara is-qımyldyń jańa formatyna kóshýdi, osy oraıda reseılik tehnologııalarmen AES salý múmkindigin usynamyz», - dedi V. Pýtın.
Óz kezeginde energetıka mınıstri Qanat Bozymbaev reseılik taraptyń Qazaqstanda atom elektr stansasyn salý usynysyna qatysty pikir bildirgen bolatyn.
