Ekologtar Kaspıı sýynyń nelikten qara túske boıalǵanyn túsindirdi

AQTAÝ. QazAqparat - Ekologııa jáne tabıǵı resýrstar mınıstrligi Kaspııdegi sý túsiniń ózgerý sebepterin túsindirdi, dep habarlaıdy QazAqparat.

Eske sala keteıik, biz buǵan deıin Aqtaý qalasyndaǵy 4-shi shaǵynaýdan aýmaǵyndaǵy Kaspıı teńizi qara túske boıalǵanyn habarlaǵan bolatynbyz.

Osy oraıda Mańǵystaý oblysy boıynsha ekologııa departamentiniń mamandary jaǵdaıdyń sebebin anyqtaý maqsatynda tekserý jumysyn júrgizdi.

«Saraptaý barysynda teńizdiń qara túske boıalýynyń sebebi - shirigen teńiz ósimdikteriniń ydyraýy jáne teńiz túbindegi kópjyldyq tabıǵı qubylystarǵa baılanysty tunbanyń jınalýy ekendigi anyqtaldy» deıdi mamandar.

Ekologtardyń pikirinshe, alańdaýǵa eshqandaı negiz joq.

«Sonymen qatar, jaǵalaýdy laı men basqa da las zattardan tazartý úshin qajetti sharalar qabyldanady. Atalǵan másele boıynsha jergilikti ekologııa departamenti tıisti memlekettik organdarǵa hat joldady» deıdi mınıstrlik.