Ekologter Qaraǵandyda aǵyn sýda zııandy zattar mólsheriniń artqanyn anyqtady
QARAǴANDY. KAZINFORM - Qaraǵandydaǵy aeratsııa stantsııasynda tazartylǵan aǵyn sýlar quramyndaǵy lastaýshy zattardyń ruqsat etilgen shekti mólsherden asqany anyqtaldy. Jospardan tys tekserý qorytyndysy boıynsha kásiporynǵa 10 mln teńgege jýyq aıyppul salynyp, anyqtalǵan zań buzýshylyqtardy joıý mindetteldi.
Qaraǵandy oblysy boıynsha Ekologııa departamentiniń mamandary jospardan tys tekserý barysynda «Qaraǵandy Sý» JShS-niń aeratsııa stantsııasynda ekologııalyq zańnama talaptary buzylǵanyn anyqtady.
Zerthanalyq zertteýler nátıjesinde tazartylǵan aǵyn sýlar quramyndaǵy eki kórsetkish boıynsha belgilengen normatıvterdiń saqtalmaǵany belgili boldy. Atap aıtqanda, ammıaktyń (azot boıynsha) kontsentratsııasy ruqsat etilgen 2,49 mg/dm³ mólsher kezinde 2,57 mg/dm³ jetken. Al nıtrıtterdiń mólsheri normatıv boıynsha 0,365 mg/dm³ bolǵanymen, naqty kórsetkish 0,925 mg/dm³ bolǵan.
Departament málimetinshe, bul kásiporynda ammonııli azot boıynsha osyndaı zań buzýshylyq buǵan deıin de 2025 jyly tirkelgen.
Tekserý nátıjesinde kásiporynǵa qatysty ákimshilik is qozǵaldy. «Qaraǵandy Sý» JShS-ne anyqtalǵan zań buzýshylyqtardy joıý týraly nusqama berildi. Sonymen qatar kásiporynǵa 9 872 403 teńge kóleminde ákimshilik aıyppul salyndy.
Buǵan deıin Qaraǵandy oblysynda Ekologııa departamentiniń mamandary shahtalardyń birinen ekologııalyq talaptardyń buzylǵanyn anyqtaǵanyn habarlanǵan bolatynbyz.
